ඉදිරි පැය 12 තුළ දිවයින පුරා පවතින වැසි තත්ත්වයේ වැඩි වීමක් අපේක්ෂා කළ හැකි බව කාලගුණ විද්‍යා දෙපාර්තමේන්තුව පවසනවා.
එමෙන්ම ප්‍රදේශ කිහිපයක් සඳහා මිලි මීටර් 100 ඉක්මවූ තද වැසි පිළිබඳ අවවාදාත්මක නිවේදන ද නිකුත් කෙරුණා.
දිවයිනට දකුණු දෙසින් පහළ වායුගෝලයේ පවතින කැළඹිලි සහිත ස්වාභය හේතුවෙන් හෙට උදෑසන තෙක් වර්ෂාපතනයේ වැඩිවීමක් අපේක්ෂා කළ හැකි බව කාලගුණ විද්‍යා දෙපාර්තුමේන්තුව පවසනවා.
ඒ අනුව ඌව , නැගෙනහිර සහ මධ්‍යම පළාත්වලත් පොළොන්නරුව, හම්බන්තොට සහ මුලතිව් දිස්ත්‍රික්ක සඳහාත් තද වැසි පිලිබඳ අවවාදාත්මක නිවේදන නිකුත් කර තිබෙනවා.
එම ප්‍රදේශවලට මිලිමීටර් 100 ඉක්ම වූ තද වැසි ඇතිවිය හැකි බව කාලගුණ විද්‍යා දෙපාර්තමේන්තුව අනතුරු අඟවනවා.
මේ අතර වර්ෂාපතනය වැඩිවීම හේතුවෙන් හුරුලු වැව, අලුත් දිවුල්වැව, කිවුලේකට වැව හා මානම්කට්ටිය වැව යන
ප්‍රධාන වැව් හා කුඩා වැව් රැසක වාන් දොරටු යළි විවෘත කර තිබෙනවා.
අඛණ්ඩව 10වන දිනටත් හුරුලුවැව වාන් දමන අතර ඉන් තත්ත්පරයට ඝණ අඩි 206ක ජල ධාරිතාවක් යාන් ඔයට මුදාහැරෙනවා.
අලුත් දිවුල්වැව ජලාශයද අද උදෑසන වාන් දැමීම ආරම්භ වූ අතර එහි ජලය ද මුදා හැරෙන්නේ යාන් ඔයටයි.
කවුඩුල්ල ජලාශයේ වාන් දොරටු 06ක් අගල් 09 බැගින් අද දහවල් විවෘත කෙරුණා.
ඉන් තත්පරයට ඝන අඩි 1350ක ජල ධාරිතාවක් කහඹිලියා ඔයට මුදාහැරෙන බැවින් ඔය පරිහරණය කරන ජනතාව වඩා සැලකිලිමත් වන ලෙස වාරි මාර්ග නිළධාරීන් දැනුම් දෙනවා.
ජල පෝෂක ප්‍රදේශවලට ඇදහැලෙන අධික වර්ෂාපතනය හේතුවෙන් නාච්චදූව වැවේ වාන් දොරටු 04ක් අද විවෘත කෙරුණා.
මේ වන විට නාච්චාදූව වැවෙන් මල්වතු ඔයට මුදාහැරෙන ජල ධාරිතාව තත්ත්පරයට ඝණ අඩි 734ක්.
මහියංගනය සොරබොරවැව පිටාර ගැලීමෙන් ප්‍රදේශයේ නිවාස 23ක් මේ වන විට ජලයෙන් යටව පවතිනවා. ජල ගැලීම් හේතුවෙන් ප්‍රදේශයේ ගමනාගමනයටද බාධා එල්ල වුණා.
කොළඹ කතරගම මාර්ගය හම්බන්තොට වැලිගත්ත ප්‍රදේශයෙන් ජලයෙන් යටවී ඇති අතර මේ වන විට සැහැල්ල වාහන ධාවනය සම්පූර්ණයෙන්ම නතර කර තිබෙනවා.
පසුගිය ඔක්තෝබර් 15 වැනිදා බණ්ඩාරවෙල බදුල්ල මාර්ගයේ තංතිරිය ප්‍රදේශයේ පස් කන්දක් කඩා වැටීමෙන් ගොඩනැගිල්ලක් හා එම ස්ථානයේ තිබු වාහන 3ක් යට වුණා.
එහි ඉතිරි කොටස ද පවතින වර්ෂාව හේතුවෙන් ඊයේ දහවල් නාය ගිය අතර පස් කන්දට යටවූ වාහන තවමත් පිටතට ගැනීමට නොහැකිව එලෙසම පවතිනවා.
නැගෙනහිර පළාතට බලපා ඇති අයහපත් කාලගුණය හේතුවෙන් මුහුදේ දැඩි කැළඹිලි ස්වභාවයක් දැකගත හැකි බව අප වාර්තාකරු සඳහන් කළා.
ධීවරයින්ට මුහුදට නොයන ලෙස දන්වා ඇති පසුබිමක මුහුදු ගිය ධීවරයෙකුගේ බෝට්ටුවක් අනතුරට පත්ව තිබෙනවා. අනතුරින් දිවි බේරා ගැනීමට ධීවරයා සමත් වුණා.
