ශ්‍රී ලංකාවට ගිනිකොන දෙසින් බෙංගාල බොක්ක මුහුදු ප්‍රදේශයේ පවතින ගැඹුරු පීඩන අවපාතය අද (09) පෙරවරු 6.00 වන විට විට මඩකලපුව සිට කිලෝමීටර් 170ක් පමණ නැගෙනහිර දෙසින් පිහිටා තිබූ බව කාලගුණ විද්‍යා දෙපාර්තමේන්තුව නිවේදනය කරනවා.
එම ගැඹුරු පීඩන අවපාතය වයඹ දෙසට ගමන් කර අද (09) සවස් කාලයේ දී පොතුවිල් සහ ත්‍රිකුණාමලය අතර ශ්‍රී ලංකා වෙරළ තීරය හරහා ගමන් කිරීමට බොහෝ දුරට ඉඩ ඇති බවයි කාලගුණ විද්‍යා දෙපාර්තමේන්තුව පවසන්නේ.
එහි බලපෑම හේතුවෙන් දිවයිනේ, විශේෂයෙන් උතුරු, උතුරු මැද, නැගෙනහිර, ඌව සහ මධ්‍යම පළාත් වල වැසි සහ සුළං තත්ත්වයේ වර්ධනයක් බලාපොරොත්තු විය හැකි බවයි දැනුම් දෙන්නේ.
ඒ, අනුව ඉදිරි දින තුනක කාලය තුළ දී දිවයිනේ දිස්ත්‍රික්ක 09ක මිලි මීටර් 100ට වැඩි තද වැසි ඇතිවිය හැකි බවයි එම දෙපාර්තමේන්තුව සඳහන් කළේ.
මුලතිව්, මන්නාරම, වවනියාව, යාපනය, කිලිනොච්චියට, අනුරාධපුර, පොළොන්නරුව, ත්‍රිකුණාමලය සහ මාතලේ එම දිස්ත්‍රික්ක වනවා.
මේ අතර නැවත දැනුම් දෙන තුරු දිවයින වටා වන ගැඹුරු සහ නොගැඹුරු මුහුදු ප්‍රදේශවල ධීවර සහ නාවික කටයුතු වලින් වැළකී සිටින ලෙස දැනුම් දෙනවා.
උතුරු අක්ෂාංශ 04 – 14 ත් අතර සහ නැගෙනහිර දේශාංශ 76 – 85 ත් අතර මුහුදු ප්‍රදේශයට නැවතදැනුම් දෙන තුරු යාත්‍රා නොකරන ලෙසයි ධීවර සහ නාවික ප්‍රජාවන්ට කාලගුණ අංශ විසින් දැනුම් දී ඇත්තේ.
දැනට මෙම මුහුදු ප්‍රදේශවල ධීවර කටයුතුවල යෙදී සිටින පිරිස වහාම ගොඩ බිමට හෝ ආරක්ෂිතස්ථානයක් වෙත යොමුවන ලෙසට දන්වා සිටිනවා.
කිසිම කෙනෙකුට කරදරයක් නොවේවා.