ඊශ්‍රායලයෙන් නියමුවන් රහිත නිරීක්ෂණ ඩ්‍රෝන යානා (unmanned aerial vehicles) මිලදී ගැනීම සඳහා රජය විසින් රුපියල් බිලියන 4.26ක ගනුදෙනුවක් සිදු කිරීමට යාම සම්බන්ධයෙන් ශ්‍රී ලංකා මුස්ලිම් කොංග්‍රසයේ (SLMC) නායක, පාර්ලිමේන්තු මන්ත්‍රී රවුෆ් හකීම් දැඩි කනස්සල්ල පළ කර තිබෙනවා.
මෙම මිලදී ගැනීමේ ක්‍රියාවලිය පිළිබඳව ප්‍රශ්න කර ඇති ඔහු, මෙම යානා එක්සත් ජනපදය වෙනුවෙන් බුද්ධි තොරතුරු රැස් කිරීමට යොදා ගත හැකි බවට ද චෝදනා කරනවා.
පාර්ලිමේන්තුවේ අයවැය විවාදය අතරතුර අදහස් දක්වමින් හකීම් ප්‍රශ්න කර සිටියේ, තරඟකාරී ලංසු කැඳවීමකින් තොරව රජය මෙම මිලදී ගැනීම සිදු කිරීමට කටයුතු කරන්නේ මන්ද යන්නයි.
“මෑතකදී රුපියල් බිලියන 4කට අධික අතිරේක ඇස්තමේන්තුවක් පාර්ලිමේන්තුවට ඉදිරිපත් කෙරුණේ මිනිසුන් රහිත ගුවන් යානා (ඩ්‍රෝන යානා) මිලදී ගැනීම සඳහායි. අපි මේවා මිලදී ගන්නේ කාගෙන්ද? ඊශ්‍රායලයෙන්,” යැයි හකීම් පෙන්වා දෙනවා.
“මෙතරම් හදිසියක් ඇත්තේ ඇයි? ටෙන්ඩර් කැඳවීමකින් තොරව, ඔවුන් කෙළින්ම මෙම මිලදී ගැනීම සිදු කිරීමට කටයුතු කරනවා. අපි ඇයි මේ යානා ඊශ්‍රායලයෙන් මිලදී ගන්නේ?” ඔහු ප්‍රශ්න කළා.
මෙම මිලදී ගැනීමට අදාළව මූල්‍යමය අල්ලස් හෝ දීමනා ලැබී තිබිය හැකි බවට ද හකීම් සැක මතු කළා. “ඊශ්‍රායල රජයෙන් කොපමණ කොමිස් මුදලක් ලැබී තිබේදැයි කවුද දන්නේ?” ඔහු විමසා සිටියා.
තවදුරටත් අදහස් දැක්වූ SLMC නායකයා චෝදනා කළේ, මෙම නිරීක්ෂණ ඩ්‍රෝන යානා ඉරාන නෞකා නිරීක්ෂණය කිරීමට සහ ඒ පිළිබඳ බුද්ධි තොරතුරු එක්සත් ජනපදයට ලබා දීමට යොදා ගත හැකි බවයි.
“ඉරානයට ඔත්තු බැලීමටත්, ඉරාන නෞකාවල ගමන් බිමන් නිරීක්ෂණය කිරීමටත්, ඒවා පිළිබඳ බුද්ධි තොරතුරු ලබා දීමටත් මෙම යානා මිලදී ගන්නවා,” යැයි හකීම් චෝදනා කළා.
“අපේ නාවික හමුදාව සහ ගුවන් හමුදාව යොදාගෙන අපි ඇමරිකානුවන් වෙනුවෙන් ඔත්තු බලන්නද යන්නේ?” ඔහු නැවතත් ප්‍රශ්න කළා.
රටේ විදේශ සබඳතාවලට බලපෑම් ඇති කළ හැකි ක්‍රියාකාරකම්වලට ශ්‍රී ලංකාවේ ආරක්ෂක හමුදා සම්බන්ධ කර නොගන්නා ලෙස ඔහු රජයට අනතුරු අඟවනවා.
“මෙවැනි ක්‍රියාවල නිරත වෙමින් ඔබම අමාරුවේ වැටෙන්න එපා. දැනටමත් ඔබ ප්‍රමාණවත් තරම් ගැටලු නිර්මාණය කරගෙනයි තිබෙන්නේ,” ඔහු පෙන්වා දුන්නා.
ගාසා තීරයේ පවතින මානුෂීය අර්බුදය වෙත ද අවධානය යොමු කළ හකීම්, පලස්තීන ජනතාව දිගින් දිගටම පීඩා විඳිමින් සිටියදී ඊශ්‍රායලයෙන් ගුවන් යානා මිලදී ගැනීමට රජය ගත් තීරණය පිළිබඳව දැඩි කණස්සල්ලෙන් යුතුව ප්‍රශ්න කළා.
“මේ අධික වර්ෂාව මැද ගාසා තීරයේ ජනතාව විඳින දුක් වේදනා දෙස බලන්න,” ඔහු රජයෙන් ඉල්ලීමක් කළා.
“ටෙන්ඩර් කැඳවීමකින් තොරව ඊශ්‍රායලයෙන් මෙම යානා මිලදී ගැනීමට තීරණය කිරීමට පෙර, පලස්තීන ජනතාව ගැනත් සිතා බලන්න,” යැයි හකීම් අවධාරණය කළා.
එ “ඔබේ විදේශ ප්‍රතිපත්තිය ගැන අපට දේශනා කරන්න එපා,” යැයි ඔහු ආණ්ඩු පක්ෂ මන්ත්‍රීවරුන්ට චෝදනා කළා.
ශ්‍රී ලංකා ගුවන් හමුදාව සඳහා මිනිසුන් රහිත ගුවන් යානා (ඩ්‍රෝන) පද්ධතියක් ස්ථාපිත කිරීම වෙනුවෙන්, රුපියල් බිලියන 4.261ක අතිරේක ඇස්තමේන්තුවක් පාර්ලිමේන්තුව විසින් නොවැම්බර් 5 වැනිදා අනුමත කර තිබෙනවා.
‘BlueBird Aero Systems’ ආයතනය සම්බන්ධ කර ගනිමින්, රජයන් අතර ගිවිසුමක් මගින් ඊශ්‍රායලයේ නිෂ්පාදිත මිනිසුන් රහිත ගුවන් යානා හතරක් ලබා ගැනීමට රජය අපේක්ෂා කරන බව ආරක්ෂක නියෝජ්‍ය අමාත්‍ය අරුණ ජයසේකර මීට පෙර පාර්ලිමේන්තුවේදී ප්‍රකාශ කර තිබුණා.
මෙම මිලදී ගැනීම හදිසි අවශ්‍යතාවක් මත සිදු කෙරෙන බව සඳහන් කළ නියෝජ්‍ය අමාත්‍යවරයා, මෙම ගුවන් යානා සමුද්‍රීය නිරීක්ෂණ කටයුතු, සැක කටයුතු යාත්‍රා නිරීක්ෂණය කිරීම, අතුරුදහන් වූ ධීවරයින් සොයා ගැනීම සහ ආපදා ප්‍රතිචාර මෙහෙයුම් සඳහා යොදා ගන්නා බව ප්‍රකාශ කළා.
මෙම මිලදී ගැනීම සඳහා අතිරේක අරමුදල් අවශ්‍ය නොවන බවත්, ගුවන් හමුදාවේ දැනට පවතින හෙලිකොප්ටර් නඩත්තු ප්‍රතිපාදන තුළ ඉතිරි වූ මුදල් මේ සඳහා යොදා ගන්නා බවත් රජය ප්‍රකාශ කර තිබෙනවා.
