මගීන් 65 දෙනෙකු රැගත් සංක්‍රමණික යාත්‍රාවක් ලිබියානු මුහුදු තීරයේ දී පෙරළී අනතුරට ලක්ව තිබෙනවා.
එහි සැලකිය යුතු පාකිස්තාන ජාතිකයන් පිරිසක් සිටින්නට ඇතැයි විශ්වාස කෙරෙනවා.
ලිබියානු විදේශ කටයුතු අමාත්‍යාංශය පැවසුවේ මගීන්ගේ අනන්‍යතාව තහවුරු කර ගැනීමට සහ අනතුරට පත් වූවන් මුදා ගැනීමට උත්සාහ කරමින් සිටින බවයි.
වින්දිතයන් හඳුනා ගැනීමට සහ අවශ්‍ය කොන්සියුලර් සහාය ලබා දීමට ප්‍රාදේශීය බලධාරීන්ට සහාය වීමට ට්‍රිපොලි හි පාකිස්තාන තානාපති කාර්යාලය විසින් කණ්ඩායමක් අනතුර සිදු වූ මුහුදු ප්‍රදේශයට ආසන්න රෝහල වෙත යොමු කර තිබෙනවා.
නීතිවිරෝධීව යුරෝපයට සංක්‍රමණය වන පුද්ගලයින්ගේ ප්‍රධාන සංක්‍රමණ මධ්‍යස්ථානයක් ලෙස ලිබියාව සැලකෙනවා.
පසුගිය මාසයේ දී මෙවැනි සිදුවීමක දී, මොරොක්කෝ වෙරළ ආසන්නයේදී මගීන් 80 දෙනෙකු රැගත් බෝට්ටුවක් පෙරළී ගිය අතර එහිදී මියගිය 40 දෙනා අතර පකිස්තාන ජාතිකයන් 13 දෙනෙකු ද සිටියා.
වැඩිවන මරණවලට ප්‍රතිචාර වශයෙන්, පකිස්ථාන බලධාරීන් නීතිවිරෝධී සංක්‍රමණ මැඩලීමේ උත්සාහයන් ද තීව්‍ර කර තිබෙනවා.
