දිවයිනේ ඇතැම් ප්‍රදේශවලට බලපා ඇති අයහපත් කාලගුණික තත්ත්වය හේතුවෙන් ඇති ව තිබෙන අවදානම් තත්ත්වය පහව යන තුරු මහනුවර – මහියංගණය ප්‍රධාන මාර්ගය රාත්‍රී කාලයේ දී වසා දැමීමට පියවර ගෙන තිබෙනවා.
දසත වාර්තාකරු පැවසුවේ එම මාර්ගයේ ගල් පෙරළීම, කඳු නාය යෑම් අවදානමක් පවතින බවට ඊයේ (20) පස්වරුවේ එහි පර්‍යේෂණ සංචාරයේ නිරත වූ ගොඩනැගිලි පර්‍යේෂණ සංවිධානයට නිරීක්ෂණය වී ඇති බවයි.
මේ හේතුවෙන් එම කලාපය රාත්‍රියේ දී කිසිසේත්ම වාහන ධාවනය සඳහා ඉඩ නොදීමට තීරණය කළ බව මහනුවර දිස්ත්‍රික් ලේකම් ඉන්දික උඩවත්ත මහතා ප්‍රකාශ කළා.
අධික වැසි හේතුවෙන් මෙම මාර්ගයේ ගමන් කිරීම අනතුරුදායක බැවින් අදාළ අංශ සමඟ අද පැවති සාකච්ඡාවේ දී මෙම තීරණය ගත් බවයි ඒ මහතා වැඩිදුරටත් පැවසුවේ.
ජාතික ආපදා කළමනාකරණ මධ්‍යස්ථානය, උඩුදුම්බර ප්‍රාදේශීය ලේකම් කාර්යාලය, තෙල්දෙණිය හා උඩුදුම්බර පොලීසිය, මර්ග සංවර්ධන අධිකාරිය ඇතුළු ආයතන රැසක ප්‍රධානීන්ගේ සහභාගීත්වයෙන් මහනුවර දිස්ත්‍රික් ලේකම් කාර්යාලයේ දී මෙම සාකච්ඡාව පැවැත්වුණා.
ඒ අනුව අද පස්වරු 06.00 සිට හෙට (22) උදෑසන 06.00 දක්වා මාර්ගය වසා තබන බවත් අවදානම් තත්ත්වය පහව යන තුරු රාත්‍රී කාලයේ දී වාහන ගමනාගමනය අත්හිටුවීම සිදු කරන බවත් වාර්තා වනවා.
