ජංගම දුරකථන සිම්පත් හිමිකරුවන්ට ත්යාග සහ දිනුම් ඇදී ඇති බව පවසා එම ත්යාග සහ දිනුම් ලබාගැනීමට මුදල් ගෙවන ලෙස දන්වා ඉන්පසුව ඔවුන්ගේ බැංකු කාඩ් අංක ලබාගැනීමෙන් අනතුරුව එහි ඇති මුදල් වංචා කිරීමේ සිද්ධියක් සම්බන්ධයෙන් පුද්ගලයන් හයදෙනෙක් අත්අඩංගුවට ගැනීමට පුත්තලම කොට්ඨාශ අපරාධ විමර්ශණ ඒකකට සමත්ව තිබෙනවා.
මෙලෙස අත්අඩංගුවට ගෙන ඇත්තේ පාලවිය, කරඹ හා අවට පදිංචි වයස අවුරුදු 18ත්, 22ත්, අතර වියේ පසුවන් සැකකරුවන් හයදෙනෙක්.
මොවුන් සංවිධානාත්මක ලෙස ඉතා සූක්ෂම වසර ගණනාවක සිට මෙම ජාවාරමේ නිරතව සිට ඇති බවටයි අනාවරණය වී ඇත්තේ.
සැකකරුවන් පුද්ගලයින් කිහිපදෙනකු අමතා ඔවුන්ගේ සිම්පත් සඳහා දැවැන්ත ත්යාග හා දිනුම් හිමිවී ඇති බවත්, එම ත්යාග හා මුදල් ලබාගැනීම සඳහා සිම්පත් හිමිකරු විසින් එම ත්යාගවල වටිනාකමින් අඩක් ගෙවන ලෙසත් දන්වා තිබෙනවා.
පසුව එම ත්යාග නිවසටම ලබාදීමට කටයුතු කරන බවත්, ඒ සදහා බැංකු කාඩ්පත් ඕපීටී අංකය ලබාදීමෙන් අනතුරුව එම සමාගම විසින් අදාළ මුදල බැංකුව හරහා ලබාගැනීමෙන් අනතුරුව භාණ්ඩය ලැබීමට සලස්වන බවයි පවසා ඇත්තේ.
පසුව මෙම කූට ජාවාරමට හසුවූ බොහෝ පිරිසක් විසින් පොලිසියට කරන ලද පැමිණිල්ලකට අනුව සිදුකළ විමර්ශණවල දී සැකකරුවන් අතඅඩංගුවට ගැනීමට සමත්ව තිබෙනවා.
එහිදී ඔවුන් සන්ථකයේ තිබී ස්මාර්ට් වර්ගයේ ජංගම දුරකථන තුනක් හා සාමාණ්ය මාදිලියේ ජංගම දුරකථන තුනක්, මුදලින් රුපියල් එක් ලක්ෂ විසිපන්දහසක මුදලක් හා බැංකු කාඩ්පත් නවයක් සොයාගැනීමට පොලිසියට හැකිව තිබෙනවා.
