ආරුගම්බේ සංචාරක පුරවරයට ත්රස්ත ප්රහාරයක් එල්ල කිරීමට සැලසුම් කළ බව කියන සිද්ධිය සම්බන්ධයෙන් පොලිස් අත්අඩංගුවේ පසුවන සැකකරුවන් දෙදෙනෙකු දින 90ක් රඳවා තබාගෙන ප්රශ්න කිරීමට පියවර ගෙන ඇති බව ත්රස්ත මර්දන විමර්ශන කොට්ඨාසය කොළඹ අතිරේක මහේස්ත්රාත් පසන් අමරසේන මහතාට අද (29) දැනුම් දුන්නා.
එම සිද්ධිය සම්බන්ධයෙන් අත්අඩංගුවට ගත් සැකකරුවන් සිව්දෙනෙකුගෙන් දෙදෙනෙකු දින 90ක් රඳවා තබාගෙන මේ වන විටත් ප්රශ්න කරමින් සිටින බවත් ආරක්ෂක අමාත්යවරයා වශයෙන් ජනාධිපතිවරයාට ලැබී ඇති බලතල අනුව සෙසු සැකකරුවන් දෙදෙනාද දින 09ක් රඳවා තබාගෙන ප්රශ්න කිරීමට එසේ පියවර ගෙන ඇති බව ද මෝසමක් ගොනු කරමින් එම විමර්ශන කොට්ඨාසය අධිකරණයට දන්වා සිටියා.
එම සැකකරුවන් සිව්දෙනාගෙන් අනාවරණය කරගත් තොරතුරු අනුව මෙම සිද්ධියට තවත් සැකකරුවන් පිරිසක් සම්බන්ධව ඇති බවට තොරතුරු හෙළිවී ඇති බවත් ඔවුන් අත්අඩංගුවට ගෙන සිද්ධිය සම්බන්ධයෙන් ප්රකාශ ලබාගෙන විමර්ශනය කිරීමට අවශ්ය පියවර ගෙන ඇති බව ද එම කොට්ඨාශය මෝසම ඉදිරිපත් කරමින් අධිකරණය හමුවේ පැවසුවා.
ආරුගම්බේ ප්රදේශයේ සංචාරක පුරවරයේ සිටින ඊශ්රායල් ජාතිකයින් ඉලක්ක කර ගනිමින් ප්රහාරයක් එල්ල කිරීමේ සැලසුමක් ඇති බවට ඉකුත් සැප්තැම්බර් මාසයේ දී ලද තොරතුරක් අනුව මෙම සිද්ධිය සම්බන්ධයෙන් විමර්ශන සිදුකළ බවත්, ඒ අනුව සැකකරුවන් සිව්දෙනකු අත්අඩංගුවට ගත් බවත්, එම කොට්ඨාසය මෝසමක් ඉදිරිපත් කරමින් පෙර නඩු වාරයේදී අධිකරණය වෙත දැනුම්දී තිබුණා.
