ඇඹිලිපිටිය නගරයේ ප‍්‍රසිද්ධ ස්ථානයක ව්‍යාජ ඡන්ද පොළක් පවත්වා ප‍්‍රතිඵල ලේඛනයක් සමාජ මාධ්‍යට නිකුත් කිරීම සම්බන්ධයෙන් වහාම විමර්ශනයක් පවත්වන ලෙසට එක්සත් ලංකා පොදුජන පක්ෂයේ ජනධිපති අපේක්ෂක ජනක රත්නායක අද (01) ඇඹිලිපිටිය පොලිසියට පැමිණ පැමිණිල්ලක් ඉදිරිපත් කළා.
මැතිවරණ නීති උල්ලංඝනය කරමින් ජාතික ජනබලවේගයේ පාක්ෂිකයින් පිරිසක් විසින් මෙම ව්‍යාජ ඡන්ද පොළ පවත්වා ඇති බවයි ජනක රත්නායක පැවසුවේ.
මෙවර ජනාධිපතිවරණය සඳහා ඉදිරිපත්ව සිටින අපේක්ෂකයින් අතරින් අපේක්ෂකයින් කිහිපදෙනෙකු තෝරාගෙන ව්‍යාජ ඡන්ද පත‍්‍රිකාවක් ද සකසා මෙම ඡන්ද පොළ පවත්වා ඇති බවයි ඔහු සඳහන් කළේ.
ජනක රත්නායක වැඩිදුරටත් සඳහන් කළේ පසුගිය අගොස්තු 21 හෝ ඊට ආසන්න දිනයක ඇඹිලිපිටිය නගර සභාව ඉදිරිපිට දී තෝරාගත් පිරිසකගේ සහභාගීත්වයෙන් මෙම ව්‍යාජ ඡන්ද පොළ පවත්වා ඇති බවයි.
මේ සම්බන්ධයෙන් තමන් මැතිවරණ කොමිෂන් සභාව වෙත පැමිණිලක් ද ඉදිරිපත් කළ බව ඔහු පැවසුවා.
