17 වැනි ආසියානු සිනමා සම්මාන උළෙලේ හොඳම චිත්‍රපටය ඇතුළු සම්මාන 4 ක් සඳහා ප්‍රසන්න විතානගේ අධ්‍යක්ෂණය කළ ‘පැරඩයිස්’ චිත්‍රපටය නිර්දේශ වී තිබෙනවා.
ශ්‍රී ලාංකේය චිත්‍රපටයක් ආසියානු සිනමා උළෙලේ සම්මාන සඳහා නිර්දේශ වූ ප්‍රථම අවස්ථාව මෙයයි.
ආසියානු සිනමා සම්මාන උළෙල මාර්තු 10 වැනිදා හොංකොං නගරයේදී පැවැත්වීමට නියමිතයි.
බූසාන් අන්තර්ජාතික චිත්‍රපට උළෙල, ටෝකියෝ අන්තර්ජාතික චිත්‍රපට උළෙල හා හොංකොං අන්තර්ජාතික චිත්‍රපට උළෙල ඒකාබද්ධව වාර්ෂිකව ‘ආසියානු සිනමා සම්මාන උළෙල’ පවත්වනු ලබනවා.
මෙවර ‘ආසියානු සිනමා සම්මාන උළෙලේ’ ජූරි සභාපතිත්වය ප්‍රවීණ ජපන් චිත්‍රපට අධ්‍යක්ෂ තියෝශි කුරොසාවා දරන අතර ආසියානු සම්මාන ඇකඩමියේ සාමාජික සාමාජිකාවෝ 200 දෙනෙක් සම්මානලාභීන් තේරීමට තම ඡන්දය පාවිච්චි කිරීමට නියමියි.
මෙවර සම්මාන උළෙලේ හොඳම චිත්‍රපටය, හොඳම අධ්‍යක්ෂණය, හොඳම තිර රචනය හා හොඳම සංස්කරණය යන සම්මාන 4 ක් සඳහා ප්‍රසන්න විතානගේ අධ්‍යක්ෂණය කළ ‘පැරඩයිස්’ චිත්‍රපටය නිර්දේශ වී ඇති අතර ශ්‍රී ලාංකේය චිත්‍රපටයක් ආසියානු සිනමා සම්මාන සඳහා නිර්දේශවූ ප්‍රථම අවස්ථාව ද මෙයයි.
ප්‍රසන්නගේ ‘පැරඩයිස්’ චිත්‍රපටය පසුගියදා ප්‍රංශයේ ‘වෙසුල් අන්තර්ජාතික සිනමා උළෙලේ, යොවුන් ජූරිය හොඳම චිත්‍රපටයට පිරිනමන් සම්මානය හිමිකරගත් අතර, මීට පෙර ‘බූසාන් අන්තර්ජාතික සිනමා උළෙලේ දී’ හොඳම චිත්‍රපටයට පිරිනැමෙන ‘කිට් ජොසික්’ සම්මානය ද හිමිකර ගත්තා.
මෙය ප්‍රසන්න විතානගේ පළමුවරට මලයාලම්, හින්දි හා ඉංග්‍රීසි බසින් නිර්මාණය කළ චිත්‍රපටය ලෙස සැලන අතර තිර රචනයෙන් ප්‍රසන්න විතානගේ හා අනුෂ්කා සේනානායක ද සංස්කරණයෙන් ඒ. ශ්‍රීකර් ප්‍රසාද් ද මෙම චිත්‍රපටය සඳහා දායක වී තිබෙනවා.
