අරගලය පැවති සමයේ රඹුක්කන ප්‍රදේශයේ පැවැති උද්ඝෝෂණයක් විසුරුවා හැරීමේදී පොලිස් වෙඩි තැබීමකින් කේ.ඩී. චමින්ද ලක්ෂාන් නමැති පුද්ගලයෙකු මියගොස් තවත් පිරිසක් තුවාල ලැබීමේ සිද්ධියට අදාළව කඩිනමින් නීතිමය පියවර ගැනීමට කටයුතු කළ බව නීතිපතිවරයා ශ්‍රේෂ්ඨාධිකරණයට දැනුම් දී තිබෙනවා.
එම සිද්ධියෙන් අගතියට පත් ගම්වාසීන් පිරිසක් විසින් ගොනුකර තිබූ මූලික අයිතිවාසිකම් පෙත්සම් පහක් අද කැඳවනු ලැබූ අවස්ථාවේදී යි නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජෙනරාල් ෂනිල් කුලරත්න මහතා මෙම දැනුම් දීම සිදු කළේ.
බුවනෙක අලුවිහාරේ, ගාමිණි අමරසේකර සහ අචල වෙංගප්පූලි යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියෙහි මෙම පෙත්සම් කැඳවනු ලැබුවා.
මෙහිදී පෙත්සම්කාර පාර්ශ්වය වෙනුවෙන් පෙනී සිටි නීතිඥවරු අධිකරණය හමුවේ කරුණු දක්වමින් කියාසිටියේ මෙම වෙඩි තැබීමේ සිද්ධියෙන් එක් පුද්ගලයෙකු මියගොස් තවත් 13 දෙනෙකු තුවාල ලැබූ බවයි.
සිද්ධිය සිදු වී මේ වන විට වසර එකහමාරකට අධික කාලයක් ගත වී තිබුණ ද වගකිව යුතු පොලිස් නිලධාරීන්ට එරෙහිව මේ දක්වා නීතිමය පියවරක් ගෙන නොමැති බවත් එම නීතිඥවරුන් පෙන්වා දුන්නා.
ඊට ප්‍රතිචාර දක්වමින් නියෝජ්‍ය සොලිසිටර් ජෙනරාල්වරයා අධිකරණයට දන්වා සිටියේ මෙම සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව භාරයට ගනු ලැබූ ගිනි අවි, වීඩියෝ දර්ශන සහ අනෙකුත් නඩු භාණ්ඩ විමර්ශන කටයුතු සඳහා රජයේ රස පරීක්ෂක දෙපාර්තමේන්තුව වෙත යොමුකර ඇති බවයි.
එම විමර්ශන වාර්තා ලබා ගැනීමෙන් අනතුරුව මෙම සිද්ධියට වගකිව යුතු පුද්ගලයින්ට එරෙහිව නීතිමය පියවර ගැනීම සම්බන්ධයෙන් තීන්දුවක් ගන්නා බව කියා සිටි නියෝජ්‍ය සොලිසිටර් ජෙනරාල්වරයා මෙම සිද්ධියට අතරතුර පොලිස් නිලධාරීන් 21 දෙනෙකු තුවාල ලැබූ බව ද සඳහන් කළා.
මෙහිදී විනිසුරු මඩුල්ල නියෝජ්‍ය සොලිසිටර් ජනරාල්වරයාට දැනුම් දුන්නේ රජයේ රස පරීක්ෂක දෙපාර්තමේන්තුවෙන් අදාළ විමර්ශන වාර්තා කඩිනමින් ගෙන්වාගෙන නොපමාව අවශ්‍ය ඉදිරි පියවර ගන්නා ලෙසයි.
ඒ අනුව මෙම පෙත්සම්වලට අදාළ සීමිත විරෝධතා ඉදිරිපත් කිරීම සඳහා දිනයක් ලබා දෙන ලෙස මෙහිදී නියෝජ්‍ය සොලිසිටර් ජනරාල්වරයා අධිකරණයෙන් ඉල්ලා සිටියා.
ඒ අනුව අදාළ සීමිත විරෝධතා අද දින සිට සති හයක් තුළ ගොනු කරන ලෙස වග උත්තරකරුවන්ට නියෝග කළ විනිසුරු මඩුල්ල පෙත්සම සලකා බැලීම සඳහා නැවත නොවැම්බර් මස 16 වනදා කැඳවන ලෙස නියෝග කර තිබෙනවා.
2022 වසරේ අප්‍රේල් මස 19 වනදා රඹුක්කන ප්‍රදේශයේ ඉන්ධන බෙදාහැරීමේ ක්‍රියාවලිය සම්බන්ධයෙන් ඇතිවූ උද්ඝෝෂණයකදී පොලිස් වෙඩි පහරින් කේ.ඩී. චමින්ද ලක්ෂාන් නැමැති දෙදරු පියෙකු මරණයට පත් වී තවත් පිරිසක් තුවාල ලැබීම තුළින් මූලික මිනිස් අයිතිවාසිකම් උල්ලංඝනය වූ බවට චෝදනා කර ප්‍රදේශවාසීන් පිරිසක් විසින් මෙම මූලික අයිතිවාසිකම් පෙත්සම් ඉදිරිපත් කර තිබුණා.
