ඡායා පිටපතක (ෆොටෝ කොපි) මිල රුපියල් 5කින් ඉහළ නැංවීමට සිදුවන බව සමස්ත ලංකා කොමියුනිකේෂන් හිමියන්ගේ සංගමය පවසනවා.
විදුලිබිල, කඩදාසි හා යන්ත්‍ර අලුත් වැඩියා වියදම ආදිය ඉහළයාම හේතුවෙන් මෙම පියවර ගන්නා බවයි සමස්ත ලංකා කොමියුනිකේෂන් හිමිකරුවන්ගේ සංගමයේ සභාපති ඉන්ද්‍රජිත් පෙරේරා අද පැවති මාධ්‍ය හමුවකදී කියාසිටියේ.
මෙම මිල වැඩි කිරීම අනුව ජාතික හැඳුනුම්පතක ඡායා පිටපතක් රුපියල් 10 සිට 15 දක්වාත්, ඒ 4 ප්‍රමාණයේ ඡායා පිටපතක් රුපියල් 15 සිට 20 දක්වාත් ඉහළ දමා ඇතැයි සභාපතිවරයා ප්‍රකාශ කළා.
එමෙන්ම මුද්‍රිත පිටපත් (ප්‍රින්ට්අවුට්) ලබාදීමේ ගාස්තු ද කළු සුදු පිටපතක් රුපියල් 5කිනුත්, වර්ණ පිටපතක් රුපියල් 10කිනුත් වශයෙන් මිල ඉහළ නංවන බවයි ඔහු කියාසිටියේ.
මෙලෙස ගාස්තු වැඩිකිරීමට එකම හේතුව විදුලිබිල වැඩිකිරීම නොවන අතර කඩදාසි, උපකරණ මිල මෙන්ම යන්ත්‍ර අලුත්වැඩියා වියදම ඇතුළු මිල ගණන් සියල්ල සැලකිල්ලට ගෙන මෙම පියවර ගැනීමට සිදුවූ බව ද සභාපතිවරයා සඳහන් කළා.
මෙම පියවර ගැනීම සම්බන්ධයෙන් පෙරපාසලේ සිට විශ්ව විද්‍යාල දක්වා අධ්‍යාපනය ලබන දරුවන්ගෙනුත්, ඔවුන්ගේ දෙමාපියන්ගෙනුත් සමාව ඉල්ලා සිටින අතර මෙම පියවරට එළඹුණේ කළ හැකි වෙනත් කිසිවක් නොමැති නිසා බව ද සමස්ත ලංකා කොමියුනිකේෂන් හිමිකරුවන්ගේ සංගමයේ සභාපති ඉන්ද්‍රජිත් පෙරේරා කියා සිටියා.
