අර්බුදය සාර්ථකව ජය ගනිමින් රට සෞභාග්‍යය කරා ගෙන යාමට සහ කල්පවත්නා ජාතික සංහිඳියාවේ මාවතකට ප්‍රවේශවීමට ශ්‍රී ලංකාව දරන ප්‍රයත්නයන්ට ශ්‍රී ලංකාවට සහාය වන බව යුරෝපා සංගමය පවසනවා.
රනිල් වික්‍රමසිංහ ජනාධිපති ධුරයට පත්වීම නිමිත්තෙන් විශේෂ සුබ පැතුම් පණිවුඩයක් යොමු කරමින් යුරෝපා කොමිසමේ සභාපතිනි උර්සුලා වොන් ඩර් ලේන් මේ බව සඳහන් කර තිබෙනවා.
ශ්‍රී ලංකා රජය ගෙනයන මෙම ක්‍රියාවලියේ දී අදහස් ප්‍රකාශ කිරීමේ සහ රැස්වීමේ නිදහස සහ සියලුම පාර්ශ්වකරුවන් අතර සංවාදයක් මෙන්ම නීතියේ ආධිපත්‍යයට සහ මූලික අයිතිවාසිකම්වලට ගරු කිරීම අත්‍යවශ්‍යව පවතින බව ද එම පණිවුඩයේ සඳහන්.
ජී.එස්.පී ප්ලස් කැපවීම් සම්බන්ධයෙන් ශ්‍රී ලංකාව ලබා ඇති ප්‍රගතිය පිළිබඳව යුරෝපා සංගමය විසින් කරන ලද තක්සේරුව පිළිබඳව ද අවධානය යොමු කර ඇති ඇය සඳහනක් කර ඇත්තේ ශ්‍රී ලංකාවේ ජී.එස්.පී ප්ලස් කැපවීම් පිළිබඳ ප්‍රගතිය ඉතා ඉක්මනින් යුරෝපා සංගමය විසින් තක්සේරු කරනු ඇති බවයි.
එම වාර්තාව මේ වසරේ අග භාගයේ දී හෝ 2023 මුල් භාගයේදී නිකුත් කිරීමට නියමිත අතර එමගින් සියලුම ශ්‍රී ලාංකිකයන්ගේ කෙටි හා දිගු කාලීන අවශ්‍යතා සහතික කෙරෙන ප්‍රතිපත්ති හඳුන්වාදීමට සහ මෙහෙයවීමට අපේක්ෂා කෙරෙනවා.
පෙර නොවූ විරූ ආර්ථික පසුබෑමේ විනාශකාරිත්වයෙන් සාර්ථකව ගොඩඒමට ජනාධිපතිවරයා ගන්නා උත්සාහය සාර්ථක වේවායි තමන් ප්‍රාර්ථනය කරන බව යුරෝපා කොමිසමේ සභාපතිවරිය සඳහන් කරනවා.
එමෙන්ම ජාත්‍යන්තර මූල්‍ය ආයතන සහ ණය හිමියන් සමඟ කරන සාකච්ඡා හවුල් වටිනාකම් සහ පොදු අවශ්‍යතා සඳහා වූ කැපවීම් මත පදනම්ව සිදු කෙරෙනු ඇතැයි ද ඇය විශ්වාසය පළ කරනවා.
හවුල් වටිනාකම් සහ පොදු අවශ්‍යතා සඳහා වූ කැපවීම් මත පදනම්ව දෙරටේ බැඳීම් සහ සහයෝගීතාව තවදුරටත් ශක්තිමත් කිරීමට සමීපව කටයුතු කිරීමට ද යුරෝපා සංගමයේ සභාපතිනිය කැමැත්ත පළ කර තිබෙනවා.
