පාර්ලිමේන්තුවේ ක්රම සහ විධි පිළිබඳ කාරක සභාව විසින් ශ්රී ලංකා රේගුවේ ආදායම් ඇතුළු කටයුතු පසුගියදා සමාලෝචනය කර තිබෙනවා.
එම කාරක සභාව පාර්ලිමේන්තු මන්ත්රී විජේසිරි බස්නායක ප්රධානත්වයෙන් පසුගියදා රැස්වූ අවස්ථාවේ දී මේ පිළිබඳව කරුණු සමාලෝචනය කර ඇති බව සඳහන්.
මෙහිදී අදහස් දැක්වූ රේගු අධ්යක්ෂ ජනරාල්වරයා ඇතුළු නිලධාරීන්, 2026 ජුනි 30 වනවිට අපේක්ෂිත රේගු ආදායම රුපියල් මිලියන 1,060,559 ක් බවත්, ඒ වනවිට රුපියල් මිලියන 1,379,084 ක් උපයා ඇති බවත් පවසා තිබෙනවා.
එනම් එය ප්රතිශතාත්මකව 130 %ක ප්රගතියක්.
මේ අනුව මෙම වසරේ සෑම මසකම අපේක්ෂිත රේගු ආදායමට වඩා වැඩි ආදායමක් උපයා ඇති බවත්, 2025 වසරට සාපේක්ෂව බලන විට එය සෑම මසකම ඉහළ ප්රගතියක් ලබා ඇති බවත් අදාළ දත්ත නිලධාරීන් කාරක සභාවේ දී පෙන්වා දී තිබෙනවා.
එමෙන්ම මෙම වසරේ වාහන ආනයනයට අදාළ කරුණු ඉදිරිපත් කරමින් නිලධාරීන්, 2026 ජූනි 30 වන විට වාහන 316,000ක් ආනයනය කර ඇති අතර, එයින් රුපියල් මිලියන 512,547ක බදු ආදායමක් ලැබී ඇති බවයි සඳහන් කර ඇත්තේ.
ඒ අනුව, වැඩිම බදු ආදායම වන රුපියල් මිලියන 386,726ක් ලැබී ඇත්තේ මෝටර් රථ ආනයනය මගින්.
එමෙන්ම, වැඩිම රේගු ආදායම් ගෙන දුන් භාණ්ඩ ලැයිස්තුවේ පළමු ස්ථානය හිමිව තිබුණේ, එන්ජින් ධාරිතාව 1000cc ට අඩු පෙට්රල් මෝටර් රථ සඳහා වන අතර එම අගය රුපියල් බිලියන 137.4ක්.
එනම් එය සමස්ත ආදාමෙන් 9.96% ක ප්රතිශතයක් බව සඳහන් වනවා.
ආනයනික බහාලුම් ප්රමාණයන් සහ ඒවා පරීක්ෂාවට ලක්වන ආකාරය, ශ්රී ලංකා රේගුවේ කටයුතු කාර්යක්ෂම කිරීම සඳහා නවීන තාක්ෂණය හඳුන්වා දීම, ආදායම් පරිපාලනයේ පවතින අභියෝග, ඉදිරි සැලසුම් ඇතුළු කටයුතු පිළිබඳව ද මෙම කාරක සභාවේ දී අවධානය යොමු කර තිබෙනවා.
