2024 පන්දුවාර 20 ලෝක කුසලාන ක්‍රිකට් තරගාවලිය සඳහා උගන්ඩා ක්‍රිකට් කණ්ඩායම සුදුසුකම් ලබා තිබෙනවා.
අප්‍රිකා කලාපයෙන් තරගාවලියට පිවිසෙන කණ්ඩායම් දෙක බවට පත්වී ඇත්තේ නැමීබියාව සහ උගණ්ඩාවයි.
සිම්බාබ්වේ කණඩායමට ද 2024 පන්දුවාර 20 ලෝක කුසලාන තරගාවලියට සහභාගී වීමේ අවස්ථාව අහිමි වී ගොස් තිබෙනවා.
ඒ අනුව උගන්ඩාව 2024 T20 ලෝක කුසලානයට සුදුසුකම් ලැබූ 20 වැනි කණ්ඩායම බවට පත්වනවා.
T20 ලෝක කුසලාන තරගාවලිය 2024 වසරේදී බටහිර ඉන්දීය කොදෙව් සහ ඇමරිකා එක්සත් ජනපදයේ පැවැත්වීමට නියමිතයි.
එක්දින ලෝක කුසලානය ද සුදුසුකම් ලැබීමේ වටයේදී අහිමි වීම නිසා පිට පිට දෙවැනි වරටත් ලෝක කුසලානයට පැමිණීමට අවස්ථාව අහිමි වූ සිම්බාබ්වේ කණ්ඩායමට මෙය තවත් ශෝකජනක සිදුවීමක් වනවා.
උගන්ඩාව 2024 T20 ලෝක කුසලානයට සුදුසුකම් ලැබීමට සමත්වූයේ අප්‍රිකානු අදියරේ අවසන් තරඟ වටයේදී රුවන්ඩාව පරාජය කිරීමෙන්.
සිම්බාබ්වේ කණ්ඩායම නයිජීරියාවට එරෙහිව අවසන් තරගය ජය ගැනීමට බලා සිටින අතර, උගන්ඩාව විසින් රුවන්ඩාව පරාජය කිරීමෙන් පසු සියල්ල අවසන් වුණා.
රුවන්ඩාවට පන්දුවට පහරදීමට තීරණය කර පන්දුවාර 18යි පන්දු 5කදී ලකුණු 65කට දැවී ගිය අතර උගන්ඩාව පන්දුවාර 8යි පන්දු 1කදී තම ඉලක්කය සපුරා ගත්තා.
