කලවාන, මීපාගම ජයන්ති මහා විද්‍යාලයේ ඉගෙනුම ලබන ශිෂ්‍යාවක් ක්ලාන්තය සෑදී බිම ඇද වැටීමෙන් අද (06) උදෑසන මියගොස් ඇති බව කලවාන පොලිසිය පවසනවා.
මෙලෙස මියගොස් ඇත්තේ කලවාන දකුණ කුකුළේගම පදිංචි ද 08 වන ශ්‍රේණියේ ඉගෙනුම ලබමින් සිටි ඉමල්කා සත්සරණි නැමැති 13 හැවිරිදි පාසල් ශිෂ්‍යාවකි.
අද (06) දින ඇය පාසලේ උදෑසන රැස්වීමේදී පන්සිල් ගනිමින් සිටියදි ක්ලාන්තය සෑදී වැටී ඇති අතර පසුව ඇය කලවාන මූලික රෝහල වෙත ඇතුලත් කර තිබෙනවා.
රෝහල වෙත ඇතුළත් කරන විටත් ඇය මියගොස් සිටි බව රෝහල් ප්‍රකාශකකු කියා සිටියා.
ඇයගේ දහහතර හැවිරිදි වැඩිමල් සහෝදරයාද පසුගිය කාලයේ වලිප්පු රෝගය සැදී මියගොස් තිබෙනවා.
එම පවුලේ සිටි දරුවන් දෙදෙනා මෙම දරුවන් වන අතර කලවාන මූලික රෝහල වෙත පැමිණි මියගිය ශිෂ්‍යාවගේ මව පාලනය කර ගැනීමට රෝහල් කාර්‍ය මණ්ඩලයට මහත් පරිශ්‍රමයක් දැරීමට සිදුව තිබුණා.
සිද්ධිය සම්බන්ධයෙන් කලවාන පොලිස් ස්ථානාධිපතිගේ ප්‍රධානත්වයෙන් කලවාන පොලිසිය වැඩිදුර පරීක්ෂණ පවත්වනු ලබයි.
