පස් කන්දක් කඩා වැටීමෙන් හැටන් – බලංගොඩ ප්‍රධාන මාර්ගයේ රථ වාහන ගමනාගමනයට බාධා එල්ල වී තිබෙනවා.
අප ප්‍රාදේශීය වාර්තාකරු පැවසුවේ, බලංගොඩ – දෙතනගල රක්ෂිත ජල පෝෂක ප්‍රදේශයට අද අලුයම තෙක් ඇද හැලුණු අධික වර්ෂාව හේතුවෙන් හැටන් – බලංගොඩ ප්‍රධාන මාර්ගයට පස් කන්දක් කඩා වැටී ඇති බවයි.
පස් සමග අසල තිබූ ගල් ද මාර්ගයට පෙරළී තිබෙනවා.
මේ හේතුවෙන් රථ වාහන ගමනාගමනයට ද බාධා එල්ල වී ඇති බවත් සඳහන්.
එම මාර්ගයේ මාරතැන්නවත්ත ප්‍රදේශයෙන් ප්‍රධාන මාර්ගයට පස් කන්දක් කඩා වැටීම නිසා එම මාර්ගයේ රථ වාහන ගමනාගමනය එක් මංතීරුවකට සීමා කර ඇති බවට ද වාර්තා වනවා.
දෙතනගල රක්ෂිතය හරහා පිහිටි හැටන් බලංගොඩ ප්‍රධාන මාර්ගයේ වර්ෂාව පවතින කාලය තුළ ප්‍රධාන මාර්ගයට පස් කඳු සහ ගස් කඩා වැටීමේ අවදානමක් පවතින නිසා එම මාර්ගයේ රථ වාහන ධාවනය කිරීමේ දී සැලකිලිමත් ලෙස රිය ධාවනය කරන ලෙසයි නුවරඑළිය දිස්ත්‍රික් ආපදා කලමනාකරණ ඒකකය රියදුරන්ගෙන් ඉල්ලා සිටින්නේ.
මේ අතර හැටන් බටහිර ග්‍රාම නිලධාරි වසමේ හැටන් කුඩාගම ප්‍රදේශයේ නිවසක් මතට පස් කණ්ඩියක් කඩා වැටී තිබෙනවා.
මෙමගින් ජීවිත හානි සිදු ව නොමැති අතර, සුළු වශයෙන් දේපොළ හානි සිදු ව ඇති බවයි වාර්තා වන්නේ.
