නව සැපයුම්කරුවන්ට ලබාදීමට නියමිත ඉන්ධන පිරවුම්හල්වල හිමිකරුවන් සහ කළමනාකාරීත්වයේ පළමු කණ්ඩායම් දෙක සමඟ විදුලිබල හා බලශක්ති අමාත්‍ය කාංචන විජේසේකර සාකච්ඡාවක් පවත්වා තිබෙනවා.
අද පෙරවරුවේ මෙම සාකච්ඡාව පැවති බවයි අමාත්‍යවරයා ට්විටර් පණිවුඩයක් නිකුත් කරමින් කියා සිටියේ.
ඉන්ධන පිරවුම්හල් 450ක් 150 බැගින් වූ කණ්ඩායම් 3කට වර්ග කර ඇති අතර, ඒවා නව විදේශීය ඉන්ධන සේවා ක්‍රියාකරුවන්ට ලබාදීමට කටයුතු කරන බව අමාත්‍යවරයා සඳහන් කර තිබෙනවා.
නව සමාගම් සමග ගිවිසුම්ගත වීමෙන් ඉන්ධන හල් හිමියන්ට මෙන්ම සමස්ථ ඉන්ධන පාරිභෝගිකයන්ට ඇතිවන සුබදායි ප්‍රතිඵල පිළිබඳව ඔවුන්ව දැනුවත් කළ බව ඔහු ප්‍රකාශ කළා.
එමෙන්ම, ඉන්ධන පිරවුම්හල් කාණ්ඩ වෙනුවෙන් තෝරා ගත් ක්‍රමවේදය, නව සමාගම් සමග එක්වන ඉන්ධනහල්වල ගිවිසුම්, ලාභාංශ බෙදීයාම්, QR ක්‍රමවේදයේ ඉදිරි පියවර, ඉන්ධන මිල සූත්‍රය, මිල පාලනය හා නියාමනය, නව ඉන්ධන හල් බලපත්‍ර සම්බන්ධයෙන් ඇති වැරැදි මත වැනි කරුණු සම්බන්ධයෙන් ඉන්ධනහල් හිමියන් ගේ ගැටළුවලට පිළිතුරු ලබාදීමට ද හැකියාව ලැබුණු බව ඇමතිවරයා සඳහන් කර තිබෙනවා.
චීනයේ සිනොපෙක්, යුනයිටඩ් පෙට්‍රෝලියම් ඔෆ් ඔස්ට්‍රේලියා සහ ඇමෙරිකා එක්සත් ජනපදයේ ආර්එම් පාර්ක්ස් ෂෙල් පීඑල්සී ශ්‍රී ලංකාවේ ඉන්ධන සිල්ලර වෙළඳපොළට එක් වීමට නියමිත බව රජය පසුගිය අප්‍රේල් මාසයේදී ප්‍රකාශ කිරීමෙන් අනතුරුවයි මෙම සාකච්ඡා පැවැත් වෙන්නේ.
ඔවුන්ට ශ්‍රී ලංකාව තුළ ඉන්ධන ආනයනය, ගබඩා කිරීම සහ බෙදා හැරීම සඳහා වසර 20ක වලංගු බලපත්‍රයක් ලබා දෙන අතර, මෙම යෝජනා ක්‍රමය යටතේ ඔවුන්ට CPC ඉන්ධන පිරවුම්හල් 150ක් ද ලබා දෙන බව වාර්තා වී තිබෙනවා.
