මාණ්ඩලික ණය සහ පිය පුතු සම්බන්ධය මත රැකියා ලබාදීම සම්බන්ධයෙන් ලංකා විදුලිබල මණ්ඩලයේ සිදුවී ඇති අක්‍රමිකතා කිහිපයක් සම්බන්ධයෙන් අමාත්‍ය කාංචන විජේසේකර මණ්ඩලයේ සභාපතිවරයා වෙත ලිපියක් යොමුකර තිබෙනවා.
එම ලිපිය මගින් අමාත්‍යවරයා සඳහන් කර ඇත්තේ විදුලිබල මණ්ඩලය විසින් සේවකයන්ට ලබාදෙන ණය පොලී අනුපාත සහ ඒ සඳහා එම ආයතනය බැංකුවලින් ලබාගත් ණයවල පරස්පරතාවයක් තමන් නිරීක්ෂණය කළ බවයි.
බඳවා ගැනීම් අත්හිටුවා ඇති අවස්ථාවක විදුලිබල මණ්ඩලයේ පිය පුතු සම්බන්ධය මත සේවකයන් බඳවා ගැනීම සඳහා සම්මුඛ පරීක්ෂණ පැවැත්වීම පිළිබඳ තොරතුරු ලැබී ඇති බව ද අමාත්‍යවරයා වැඩිදුරටත් පවසා තිබෙනවා.
ඒ අනුව, මාණ්ඩලික ණය යෝජනා ක්‍රමයේ ආරම්භයේ සිට නිකුත් කර ඇති ණය සහ පිය-පුතු සබඳතාව මත බඳවා ගත් සේවක ලැයිස්තුව පිළිබඳ වාර්තාවක් ද කැඳවීමටයි අමාත්‍යවරයා පියවර ගෙන ඇත්තේ.
විදුලිබල මණ්ඩලයේ ප්‍රතිව්‍යුහගත කිරීම අවසන් වන තුරු අමාත්‍යාංශයේ පූර්ව අනුමැතියකින් තොරව නව සේවකයින් බඳවා නොගන්නා ලෙසද අමාත්‍යවරයා විදුලිබල මණ්ඩලයේ සභාපතිවරයාට වැඩිදුරටත් දැනුම්දී තිබෙනවා.
