වැලිගම ඓතිහාසික සුව සහනයේ සමිඳුන්ගේ ජාතික සිද්ධස්ථානයේ වාර්ෂික මංගල්‍යය මෙවර අති උත්කර්ෂවත් අන්දමින් පැවැත්වීමට කටයුතු සැලසුම්කර තිබෙනවා.
ඒ අනුව හෙට (09) සහ අනිද්දා (10) යන දෙදින තුළ එම මංගල්‍යය පැවැත්වීමට නියමිත බවයි සිද්ධස්ථාන පරිපාලක චාල්ස් හේවාවසම් පියතුමා පවසන්නේ.
ගෙවී ගිය වසර කිහිපය තුළදී රටේ පැවති විවිධ හේතු මත ජාතික සිද්ධස්ථානයේ වාර්ෂික මංගල්‍යයන් බැතිමතුන්ගේ සහභාගීත්වයෙන් තොරව සිදුකර ඇති අතර මෙවර එය අති උත්කර්ෂවත් අන්දමින් පැවැත්වීමට නියමිතයි.
එ අනුව හෙට (09) පස්වරු 5:30 ට සන්ධ්‍යා මෙහෙය ලසන්ත ෆොන්සේකා පියතුමන්ගේ ප්‍රධානත්වයෙන් පැවැත්වීමට නියමිත අතර අනිද්දා (10) පෙරවරු 8:30 ට මංගල්‍ය මහා දිව්‍ය පූජාව ගාල්ල රඳගුරු අති උතුම් රේමන් වික්‍රමසිංහ හිමිපාණන්ගේ ප්‍රධානත්වයෙන් සිදුකිරීමට නියමිත බවයි වාර්තා වන්නේ.
දිව්‍ය පූජාවෙන් අනතුරුව සත්ප්‍රසාද වහන්සේ රැගත් පෙරහැර පවත්වා පැමිණි බැතිමතුන් වෙත ආශිර්වාද ගැන්වීමෙන් අනතුරුව මෙවර වාර්ෂික මංගල්‍යය නිමාවට පත්වීමට නියමිතයි.
