වැට් බදු මුදල් වහාම රජයට ගෙවීම ඒවා ගෙවිය යුතු තැනැත්තන්ගේ පරම වගකීම බවත් ව්‍යවස්ථාදායකයේ අභිමතය ද එය බැවින් එම මුදල් නොගෙවන තැනැත්තන්ට අධිකරණ මගින් අධික දණ්ඩන පනවා ඇති බව ද කොළඹ අතිරේක මහේස්ත්‍රාත් බණ්ඩාර ඉලංගසිංහ මහතා පැවසුවා.
එකතු කළ අගය මත බදු මුදල් 29,479,155 නොගෙවීම් මත දේශීය ආදායම් කොමසාරිස් ජනරාල්වරයා විසින් කොළඹ අතිරේක මහේස්ත්‍රාත් අධිකරණයේ පැවරු නඩුවක තීන්දුව ලබාදෙමින් මහේස්ත්‍රාත්වරයා ඒ බව ප්‍රකාශ කළා.
නිම්තෙර මෑන් පවර් සර්විස් නමැති ආයතනයක අධ්‍යක්ෂවරයෙකු වූ ප්‍රදීප් කුමාර නමැති අයෙකු මෙම සිද්ධියේ වග උත්තරකරු වන අතර අදාළ බදු මුදල නොගෙවන්නේ නම් වගඋත්තරකරුට මාස හයක ලිහිල් වැඩ සහිත සිර දඬුවමක් නියම කරන බවට ද මහේස්ත්‍රාත්වරයා දැනුම් දුන්නා.
වග උත්තරකාර අධ්‍යක්ෂවරයා වෙනුවෙන් නීතිඥ ගුණරත්න වන්නිනායක මහතා පෙනී සිටි අතර මාසිකව රුපියල් 300,000 බැගින් එම මුදල වසරක් තුළ ගෙවා අවසන් කිරීමට තම සේවාදායකයාට අවසර ලබා දෙන ලෙසට වග උත්තරකාර අධ්‍යක්ෂවරයා වෙනුවෙන් පෙනී සිටි නීතිඥ ගුණරත්න වන්නිනායක
මහතා කළ කරුණු දැක්වීමක් සලකා බැලු මහේස්ත්‍රාත්වරයා ඊට අවසර ලබා දුන් අතර වගඋත්තරකාර අධ්‍යක්ෂවරයාගේ විදෙස් ගමන් තහනම් කරන ලෙස ද නියෝග කළා.
