ව්යාපාරිකයෙකුගෙන් රුපියල් මිලියන 125 ක අල්ලසක් ලබා ගැනීමේ චෝදනාවට වරදකරුවන් කෙරුණු ශ්රී ලංකා රේගුවේ හිටපු නිලධාරීන් සිව්දෙනෙකුට කොළඹ මහාධිකරණ විනිසුරු ආචාර්ය නාමල් බණ්ඩාර බළල්ලේ මහතා අද (06) බරපතළ වැඩ සහිත වසර 35 බැගින් සිර දඬුවම් නියම කළා.
ඊට අමතරව එක් එක් විත්තිකරුවෙකුට රුපියල් මිලියන 125 බැගින් දඩ නියම කළ විනිසුරුවරයා පැමිණිල්ල විසින් විත්තිකරුවන්ට ගොනු කරන ලද චෝදනා සාධාරණ සැකයකින් තොරව ඔප්පු කර ඇති බවට නිගමනය කරමින් මෙම දඬුවම් නියම කරන බවටයි ප්රකාශ කළේ.
ඉකුත් 2015 වසරේදී ලංකා ගමනාගමන මණ්ඩලයට සැපයීම සඳහා ආනයනය කළ බස් රථ අමතර කොටස් මුදාහැරීම සඳහා පංචිකාවත්ත ප්රදේශයේ ව්යාපාරිකයෙකුගෙන් රුපියල් මිලියන 125 ක අල්ලසක් ලබා ගැනීම යන චෝදනා යටතේ නීතිපතිවරයා විසින් විත්තිකරුවන්ට එරෙහිව කොළඹ මහාධිකරණය හමුවේ එම නිලධාරීන් සිව් දෙනාට අධි චෝදනා ගොනුකර තිබුණා.
