ඉකුත් 15 වැනි දා සිට විවෘත කර තිබූ කලාවැවේ හදිසි වාන් දොරටු දෙක ඊයේ පෙරවරු 11ට පමණ සම්පූර්ණයෙන් ම වසා දැමීමට කටයුතු කළ ද, යළිත් එදින ම පස්වරුවේ වසා දැමුණු වාන් දොරටු දෙක විවර කිරීමට කලාවැව කාර්‍යභාර ඉංජිනේරු කාර්‍යාලයට සිදු ව තිබෙනවා.
අප ප්‍රාදේශීය වාර්තාකරු පැවසුවේ; මෙම හදිසි වාන් දොරටු දෙක අඩි 03ල් බැගින් විවෘත කර ඇති බවයි.
ඒ අනුව වාන් දොරටු දෙකෙන් තත්ත්පරයට ඝන අඩි 3000ක පමණ ජල ප්‍රමාණයක් කලාවැවට මුදා හැරෙමින් තිබෙනවා.
හදිසි වාන් දොරටු නැවත විවෘත කිරීමත් සමග කලාවැව අවුකන මාර්ගය ද අවුකන ප්‍රදේශයෙන් ජලයෙන් යට වී එම මාර්ගයේ ගමනාගමන කටයුතු ද මේ වනවිට ඇනහිට ඇති බවයි වාර්තා වන්නේ.
ප්‍රදේශයට මේ වනවිටත් වර්ෂාව ලැබෙමින් පවතින අතර රාත්‍රි 9.00 පමණ වන විට තත්ත්පරයට ඝන අඩි 2000ක පමණ ජල ධාරිතාවයක් දඹුලු ඔය ඔස්සේ කලාවැවට එක්වෙමින් පවතින බව ද වාර්තා වනවා.
ඊයේ දහවල් කලාවැව හදිසි වාන් දොරටු වසා දමන අවස්ථාවේ අක්කර අඩි 82,924ක් දක්වා පහළ ගිය කලාවැවේ සමස්ත ජල ධාරිතාව රාත්‍රිය වනවිට අක්කර අඩි 88,316 ක් දක්වා ඉහළ ගොස් ඇතැයි ද වාර්තා වන බවයි අප ප්‍රාදේශීය වාර්තාකරු කුෂාන් ජයවර්ධන පැවසුවේ.
මේ හේතුවෙන් කලාවැව අවට පහත් බිම්වල වෙසෙන ජනතාවට විමසිල්ලෙන් පසුවන ලෙසට ද දැනුම්දී තිබෙනවා.
