වවුනියාව රෝහලේ සේවය කරන ලද ප්‍රසව හා නාරිවේදය පිළිබඳ විශේෂඥ වෛද්‍ය එම්.එස්. මොහිදීන්ගේ ඝාතනය සම්බන්ධයෙන් හිටපු ප්ලොට් නායකයෙකු වූ සිවනාදන් ප්‍රේමනාත් නොහොත් ‘නෙඩුමාරන්’ නැමත්තාට පසුගියදා (07) අධිකරණය විසින් මරණ දණ්ඩණය නියමකර තිබෙනවා.
වවුනියාව මහාධිකරණයේ විනිසුරු එම්.ඉලංචේලියන් විසින් මෙම මරණ දණ්ඩණය පනවා ඇති බවයි වවුනියාව අප වාර්තාකරු සඳහන් කළේ.
පසුගිය 2009 වසරේ අප්‍රේල් 20 වනදා වවුනියාවේ පෞද්ගලික රෝහලක් ඉදිරිපිට දී වෛද්‍යවරයාට වෙඩි තැබූ බවට සැකපිට ‘නෙඩුමාරන්’ නොහොත් සිවනාදන් ප්‍රේමනාත් නැමත්තා වවුනියාව පොලිස් අපරාධ විමර්ශන අංශය විසින් අත්අඩංගුවට ගැනුණා.
අත්අඩංගුවට ගත් සැකකරු එවකට ප්ලොට් සංවිධානයේ වවුනියාව, වේප්පම්කුලම් භාරව සිටි තැනැත්තා බවයි වාර්තා වුණේ.
අත්අඩංගුවට ගත් සැකකරු පසුව ඇපමත මුදාහැර නඩු වාර පැවති අතර, 2015 වසරේ දෙසැම්බර් 31 වනදා නීතිපති දෙපාර්තමේන්තුව විසින් වව්නියාව මහාධිකරණයට අධි චෝදනාපත්‍රයක් ගොනු කිරීමත් සමඟ අදාළ සැකකරු නැවත අත්අඩංගුවට ගෙන බන්ධනාගාරගත කෙරුණා.
රජයේ අධිනීතීඥ දර්ෂිකා තිරුකුමරන් සහ ආරමුගම් තනූජන් යන අයගේ අධීක්ෂණයෙන් මෙම නඩු විභාගය පැවත්වුණු අතර, එහිදී සැකකරුට එරෙහිව සාක්ෂිකරුවන් 20 දෙනෙකුගෙන් සාක්ෂි ලබාගෙන තිබුණා.
එම සාක්ෂි මඟින් සැකකරු විසින් මෙම ඝාතනය සිදුකර ඇති බවට ඔප්පුවීමෙන් අනතුරුව වසර 14ක් පුරා පැවති මෙම නඩුවේ දී දණ්ඩනීති සංග්‍රහයේ 296 වන වගන්තියට අනුව සැකකරුට මෙලෙස මරණීය දණ්ඩණය නියම කෙරුණා.
