සූරියවැව වැවේගම ප්‍රදේශයේ වතුර මෝටර සොරකමේ පැමිණි පිරිසක් අතර අයෙක් ප්‍රදේශවාසීන්ගේ පහරකෑමට ලක්ව මියගොස් තිබෙනවා.
ඊයේ (01) රාත්‍රී සොරකමේ පැමිණි සැකකරුවෙකු ප්‍රදේශවාසීන් විසින් අල්ලාගෙන ඇති බවට ලැබුණු තොරතුරකට අනුව පොලිසිය එම ස්ථානයට ගොස් එම පුද්ගලයා පොලිස් භාරයට ගෙන තිබුණා.
ඔහුට ප්‍රදේශවාසීන් විසින් පහරදීමක් සිදු කර ඇති බවට නිරීක්ෂණය වීම හේතුවෙන් සැකකරු සූරියවැව රෝහලට ඇතුලත් කිරීමටයි පොලිසිය පියවර ගෙන ඇත්තේ.
එහිදී එම සැකකරු වැඩිදුර ප්‍රතිකාර සඳහා සූරියවැව රෝහල මගින් මාතර මහ රෝහලට රැගෙන යමින් සිටියදී මියගොස් ඇතැයි පොලිසිය ප්‍රකාශ කළා.
මියගිය සැකකරු වැවේගම ප්‍රදේශයේම පදිංචි 27 හැවිරිදි අයෙක්. පොලිසිය සිදු කළ වැඩිදුර විමර්ශනවලදී මෙම පුද්ගලයා සමග පැමිණි බවට සැක කෙරෙන තවත් පුද්ගලයන් දෙදෙනෙකු අත්අඩංගුවට ගෙන තිබෙනවා.
ඔවුන් දෙදෙනා සූරියවැව ප්‍රදේශයේ පදිංචි අවුරුදු 23 සහ 33 වයස්වල පසුවන දෙදෙනෙක්.
එම සැකකරුවන් දෙදෙනා අද හම්බන්තොට මහේස්ත්‍රාත් අධිකරණයට ඉදිරිපත් කිරීමට නියමිතයි.
පහරදීමට සම්බන්ධ සැකකරුවන් අත්අඩංගුවට ගැනීම සඳහා සූරියවැව පොලිසිය පරීක්ෂණ ආරම්භ කර තිබෙනවා.
