ඕස්ට්‍රේලියානු තුන් ඉරියව් ක්‍රීඩක මිචෙල් මාෂ් ඊයේ (01) යළි සිය මව්බිම බලා පිටත්ව ගොස් තිබෙනවා.
පෞද්ගලික හේතුවක් මත මිචෙල් මාෂ් මෙලෙස යළි ඕස්ට්‍රේලියාව බලා පිටත්ව ගොස් ඇති බවයි ඉන්දියාවෙන් තොරතුරු වාර්තා වන්නේ.
කෙසේ වෙතත් මාෂ් මෙලෙස ලෝක කුසලාන තරගාවලියෙන් ඉවත්ව ඇත්තේ දින නියමයක් නොමැතිව බවට වැඩිදුරටත් තොරතුරු වාර්තා වනවා.
තුන් ඉරියව් ක්‍රීඩකයෙක් ඕස්ට්‍රේලියානු කණ්ඩායමට අහිමිවීම ඔවුන්ගේ ලෝක කුසලාන ඉදිරි ගමනට දැඩි බලපෑමක් ඇතිවනු ඇති බවයි විචාරකයින් සඳහන් කර සිටින්නේ.
මෙවර ලෝක කුසලාන තරගාවලිය තුළ මාෂ් ලකුණු 225ක් සහ කඩුලු 02ක් ලබාගෙන සිටියා.
මාෂ් හට තරඟාවලියේ ඉතිරි තරඟ මඟ හැරුනහොත් ඔහු වෙනුවට ආදේශ කිරීමට ඕස්ට්‍රේලියාවට විකල්ප කිහිපයක්ම පවතින අතර, ඇලෙක්ස් කේරි, ෂෝන් ඇබට්, මාකස් ස්ටොයිනිස් සහ කැමරන් ග්‍රීන් එම විකල්පයන් වනවා.
මේ අතර ගොල්ෆ් රථයකින් වැටී සිදු වූ අනතුරක් හේතුවෙන් ඕස්ට්‍රේලියානු තුන් ඉරියව් ක්‍රීඩක ග්ලේන් මැක්ස්වෙල් ද එංගලන්ත තරගයෙන් ඉවත් කිරීමට තීරණය කර තිබෙනවා.
ලෝක කුසලාන තරගාවලියේ ඕස්ට්‍රේලියා සහභාගීවන මීළඟ තරගය එංගලන්ත සමඟ ලබන 04 වනදා පැවැත්වීමට නියමිතයි.
