ජනාධිපති කාර්යාලය, අග්රාමාත්ය කාර්යාලය, රාජ්ය පරිපාලන අමාත්යාංශය ඇතුළු සියලු අමාත්යාංශ හා රාජ්ය අංශයේ ආයතන ගණනාවක කාර්ය මණ්ඩලවල එකමුතුවෙන් සියලු ශ්රී ලාංකිකයන්ට විවෘත තරග හා විදේශිකයන් සඳහා තරගවලින් සමන්විතව පැවැත්වෙන “වසත් සිරිය 2023” සිංහල හා දෙමළ අලුත් අවුරුදු උත්සවය අප්රේල් 22 වන සෙනසුරාදා කොළඹ ගාලු මුවදොර හරිත භූමියේ දී පැවැත් වීමට නියමිතව තිබෙනවා.
එදින පෙරවරු 7.00 සිට පස්වරු 5.00 දක්වා පැවැත්වෙන අලුත් අවුරුදු ක්රීඩා හා තරග ඉසව්වලින් අනතුරුව පස්වරු 6.00 සිට රාත්රී 12.00 දක්වා මියැසි ප්රසංගයක් ද සංවිධානය කර ඇති බවයි ජනාධිපති මාධ්ය අංශය නිවේදනය කළේ.
රාජ්ය අංශය, විවෘත අංශය සහ ආගන්තුක අංශය යන කොටස් 03ක් යටතේ මෙහි තරග ඉසව් සංවිධානය කර තිබෙනවා.
අමාත්යාංශ හා රාජ්ය ආයතනයන්හි කාර්ය මණ්ඩලවල සාමාජික, සාමාජිකාවන්, පවුලේ හිතවතුන් සහ ළමුන් වෙනුවෙන් කාන්තා සහ පිරමි තරග ඉසව් 18ක් පැවැත්වෙනවා.
ඕනෑම ශ්රී ලාංකිකයෙකුට සහභාගිවිය හැකි විවෘත අංශයක් ද තරග 16ක් සහිතව මීට ඇතුළත්.
“පුර සැරිය” ස්ටෑන්ඩඩ් බයිසිකල් තරගය, මැරතන් ධාවන තරගය, ලිස්සන ගහ, කඹ ඇඳීම, කොට්ටාපොර ගැසීම, ඉටිපන්දම් දැල්වීම, බැලුම් පිපිරවීම, අලියට ඇස තැබීම, ටොෆි ඇහිදීම, හොඳම හිනාව අවුරුදු කුමරා සහ කුමරිය ඇතුළුව ලොකු කුඩා සැමට සහභාගිවිය හැකි තරග ඉසව් ඊට ඇතුළත් වනවා.
එමෙන්ම විදේශකයින්, තානාපති කාර්යාල, විදේශ ආයතන සහ අවට හෝටල් වල සිටින පිරිස් වෙනුවෙන් ආගන්තුක අංශයක් ද විවෘත අතර විදේශිකයන්ට විනෝද විය හැකි තරග ඉසව් 10කින් එය සමන්විතයි.
අතීත ගැමි සමාජයේ ගම සහ ගැමි ගෙදර අතර පැවති සුන්දර සබැදියාව විදහා දක්වමින් ගැමි ගෙදරක් සහිත පරිසරයක අකෘතියක් ද මෙහි ප්රතිනිර්මාණය කෙරෙනවා.
කැවිලි පෙවිලි, ඇදුම් පැළදුම්, සිංහල අවුරුදු චාරිත්ර ඇතුළත් ගැමි ගෙදරක ස්වරූපය ඉන් ප්රදර්ශයනය කෙරෙන අතර රබන් ගැසීම, පංච කෙළිය, ඔළිඳ කෙළිය, චක්ගුඩු, ජන සංගීතය, පොරපොල් ගැසීම, අං කෙළිය ඇතුළු ගැමි ක්රීඩා සහ ප්රදර්ශනාත්මක අංග රැසක් ඊට ඇතුළත්.
කතුරු ඔංචිල්ලා, උණ වෙඩි සංදර්ශන, කඩමණ්ඩිය සහ, වෙද ගෙදරකින් ද භූමිය විචිත්රවත් කර තිබෙනවා.
මියැසි ප්රසංගය රාත්රී 7.00 ට එම ස්ථානයේ දී ආරම්භ වබ බවයි ජනාධිපති මාධ්ය අංශය වැඩි දුරටත් සඳහන් කළේ.
