හිටපු ජනාධිපති ගෝඨාභය රාජපක්ෂ සමයේ තහනමට ලක් කළ කටුපොල් වගාව යළි ආරම්භ කිරීම සඳහා ක්‍රියාමාර්ග ගනිමින් සිටින බව හිටපු මුදල් අමාත්‍ය රවී කරුණානායක පවසනවා.
කටුපොල් වගාකරුවන් සමඟ පැවති සාකච්ඡාවකින් අනතුරුව හිටපු අමාත්‍යවරයා එම අදහස් පළ කළා.
කටුපොල් වගා කරන ගොවීන් මුහුණ දී ඇති ගැටලු පිළිබඳව සාකච්ඡා කිරීම සඳහා හිටපු අමාත්‍යවරයා මතුගම, බදුරලිය ප්‍රදේශයේ නිරීක්ෂණ චාරිකාවකට එක් වුණා.
එහිදී එම ගොවීන් පෙන්වා දුන්නේ කටු පොල් වගාව තහනම් කිරීම හේතුවෙන් පවුල් විශාල ප්‍රමාණයක් ආර්ථික ගැටළු රැසකට මුහුණ දී සිටින බවයි.
තම ඉඩම්වල මෙන්ම රජයේ ඉඩම්වල කටුපොල් වගා කිරීමට අවසර ලබා දුන්නොත් තේ, රබර්වලට වඩා වැඩි විදේශ විනිමයක් රටට ලබාගත හැකි බව ද ගොවීන් මෙහිදී පෙන්වා දුන්නා.
අක්කරයක වගාවක් මඟින් මසකට රුපියල් 750,00ක පමණ ආදායමක් උපයා ගත හැකි බව ද ගොවීන් මෙහිදී සඳහන් කළ අතර, ඇතැම් පුද්ගලයින්ගේ දුර්මත හේතුවෙන් මෙම භෝග වගාව තහනමට ලක්කර ඇති බවයි ඔවුන් වැඩිදුරටත් සඳහන් කළේ.
මෙහිදී අදහස් දක්වමින් හිටපු අමාත්‍ය රවී කරුණානායක සඳහන් කර සිටියේ මේ සම්බන්ධයෙන් පවතින දුර්මත ඉවත් කරගෙන කටු පොල් වගාව පිළිබඳව විශේෂඥ දැනුම් ඇති පුද්ගලයින් පිළිබඳව සාකච්ඡා කර යළි වගා කරවීම සඳහා අවසර ලබාදීමට කටයුතු කරන බවයි.
ජනාධිපතිවරයා සමඟ සාකච්ඡා කර ලබන ජනවාරි මාසය වන විට පවතින තහනම ඉවත් කිරීම සඳහා කටයුතු සලසා දෙන බවයි හිටපු අමාත්‍යවරයා පැවසුවා.
ඒ, අනුව ඉදිරියේදී සියලු දෙනාගේ සහයෝගය ඇතිව වාණිජ භෝගයක් ලෙස කටුපොල් වගාව ව්‍යාප්ත කිරීම සඳහා පියවර ගන්නා බවයි ඔහු වැඩිදුරටත් පැවසුවේ.
