මිලියන 1000ක වන්දියක් ඉල්ලා හිටපු රාජ්‍ය ඇමති නිමල් ලාන්සා මන්ත්‍රීවරයා විසින් හිටපු නියෝජ්‍ය අමාත්‍ය රන්ජන් රාමනායක මහතාට එරෙහිව මීගමුව දිසා අධිකරණයේ පවරා තිබු වන්දි නඩුව අද සමතයකට පත්වී තිබෙනවා.
ඒ අදාළ නඩුව අද මීගමුව අතිරේක දිසාවිනිසුරු ඉදිරියේ කැඳවූ අවස්ථාවේදී යි.
2014 වසරේ මාර්තු මස 26 දින මීගමුව ලෙයිටන් පාර්ක් පිටියේ පැවති එක්සත් ජාතික පක්‍ෂයේ රැස්වීමකදී රන්ජන් රාමනායක මහතා විසින් සිදු කළ ප්‍රකාශයකින් තමන්ගේ කීර්ති නාමයට සිදුවූ හානියට වන්දි ඉල්ලා නිමල් ලාන්සා විසින් මෙම නඩුව පවරා තිබුණා.
එම නඩුව අද අතිරේක මහේස්ත්‍රාත්වරයා හමුවේ සමතය සඳහා කැඳවූ අවස්ථාවේදී රන්ජන් රාමනායක මහතා වෙනුවෙන් අධිකරණය හමුවේ කරුණු දැක්වූ නිතිඥවරයා කියාසිටියේ විත්තිකරුගේ වචනවල කිසිදු අවස්ථාවක පැමිණිලිකරුගේ නම භාවිතා කර නොමැති අතර විත්තිකරුගේ වචනවලින් පැමිණිලිකරුට සිත් තැවුලක් ඇතිවී ඇත්නම් ඒ පිළිබඳ කනගාටුව ප්‍රකාශ කරන බවයි.
විත්තිකරු පසුගිය කාලයේ මුහුණ දුන් කරුණු සලකා බලා අද දිනයේ විවෘත අධිකරණයේ සිදු කළ කණගාටුව ප්‍රකාශ කිරීම පැමිණිලිකරු පිළිගන්නා බැවින් එම කරුණු අනුව සමත නඩු තීන්දුවක් ඇතුලත් කරන ලෙසත් පැමිණිලිකාර නිමල් ලාන්සා වෙනුවෙන් පෙනිසිටි නීතිඥයන් ඉල්ලීමක් කළා.
ඒ අනුව මෙම නඩුවේ නඩුකටයුතු අවසන් කරන ලෙස අධිකරණයෙන් ඉල්ලා සිටින බවයි පැමිණිලිකාර නිමල් ලාන්සාගේ නීතිඥයන් ඉලිලීමක් කළේ.
