එකම ගමේ පදිංචි මිතුරා බේකරියක් තුළදී ඝාතනය කර වසරක කාලයක් සඟවා සිටි පුද්ගලයකු බස්නාහිර පළාත් දකුණු දිශාව අපරාධ කොට්ඨාසය විසින් අත්අඩංගුවට ගෙන තිබෙනවා.
අදාළ සැකකරු නුගේගොඩ ප්රදේශයේ බේකරියක සේවය කරමින් සිටිය දී මෙලෙස අත්අඩංගුවට ගත් බවයි පොලිසිය සඳහන් කළේ.
ඒ, සමඟ ඝාතනය සඳහා යොදාගත් උල් පිහියක් ද වැල්ලම්පිටිය, වෙන්නවත්ත ප්රදේශයේ අතහැර දමන ලද වැසිකිළි වළක තිබී සොයා ගැනීමට හැකිව තිබෙනවා.
ඝාතනයට ලක් වූ පුද්ගලයා කොළොන්නාව, මීතොටමුල්ල ප්රදේශයේ බේකරි බාස්වරයකු (බක්කරේ) ලෙස වසර කීපයක සිට සේවය කර ඇති අතර, ඔහු පස්සර, මඩෝල්සිම ප්රදේශයේ පදිංචි 38 හැවිරිදි වියේ පසු වූ අයෙක්.
මෙම පුද්ගලයා රැකියාවක් නොමැතිව සිටි සිය මිතුරාට තම රැකියා ස්ථානයේම රැකියාවක් ලබාදීමට කටයුතු කර ඇති බවයි වාර්තා වන්නේ.
ඒ අනුව පසුගිය වසරේ ජනවාරි මාසයේ දී සැකකරු එම බේකරියේ සේවයට පැමිණ ඇති අතර දෙදෙනාම එහි සේවය කරමින් සිට ඇති බවයි විමර්ශනවලදී අනාවරණ වී ඇත්තේ.
පසුව මිතුරන් දෙදෙනා අතර ඇති වූ යම් ආරවුලක් හේතුවෙන් ඝාතනයට ලක්වූ පුද්ගලයා බේකරි හිමිකරුට කේලාම් පවසා සැකකරුගේ සේවය නැවැත්වීමට කටයුතු කර ඇති බවයි වාර්තා වුණේ.
ඒ හේතුවෙන් කෝපයට පත් සැකකාර පුද්ගලයා බේකරියෙන් පිටව ගොස් ඇති අතර, පසුගිය වසරේ අප්රේල් 22 දින දහවල් එකවරම බේකරිය වෙත පැමිණ මිතුරාට තර්ජනය කරමින් “මට රස්සාව නැතිකළ උඹටත් මේ රස්සාව කරන්න දෙන්න මම ඉඩ දෙන්නේ නැහැ උඹව මම මරනවා” යැයි තර්ජනය කරමින් ඉන් ගොස් තිබූ බවයි පොලිස් විමර්ශනවලදී අනාවරණය වී ඇත්තේ.
පාසුව ඔහු පසුදින අලුයම් කාලයේ තාප්පයෙන් පැන බේකරිය තුළට හොර රහසේ ඇතුළු වී වැඩ නිමවී පුටුවක් මත තේ පානය කරමින් සිටි සිය මිතුරාට උල් පිහියකින් ඇණ ඝාතනය කර පලාගොස් ඇති බව සඳහන්.
පසුව ඔහු සේවය කළ වැල්ලම්පිටිය ප්රදේශයේ බේකරිහිමියා හමුවට ගොස් ඔහුට ලබාගැනීමට තිබූ හිඟ මුදල් ද රැගෙන ඝාතනය සඳහා යොදාගත් පිහිය බේකරිය පිටුපසක් අතහැර දමන ලද වැසිකිළිවලකට දමා එම ස්ථානයෙන් පිටව ගොස් ඇති බවයි පරීක්ෂණ වලදී අනාවරණය වී ඇත්තේ.
