ගිනිකොනදිග බෙංගාල බොක්ක සහ යාබද නිරිතදිග බෙංගාල බොක්ක ප්‍රදේශයේ පැවති ගැඹුරු පීඩන අවපාතය බටහිරට බරව වයඹ දෙසට ගමන් කර, සුළි කුණාටුවක් දක්වා වර්ධනය වී ඇති බව කාලගුණ විද්‍යා දෙපාර්තමේන්තුව දැනුම් දෙනවා.
“මොන්තා” ලෙස නම්කර ඇති මෙම සුළි කුණාටුව ඊයේ (26) රාත්‍රීයේ නිරිතදිග සහ යාබද ගිනිකොනදිග බෙංගාල බොක්ක ප්‍රදේශයට ඉහළ, මුලතිව් සිට කිලෝමීටර් 610ක් පමණ ඊසාන දෙසින් ස්ථානගතව පැවතියා.
මෙම පද්ධතිය උතුරට බරව වයඹ දිශාවට ගමන් කර හෙට (28) දිනයේ චණ්ඩ සුළිකුණාටුවක් දක්වා තව දුරටත් වර්ධනය වී, අන්ද්‍රා ප්‍රදේශ් වෙරළ තීරය හරහා ගමන්කරනු ඇතැයි අපේක්ෂා කෙරෙන බවයි කාලගුණ අංශ පවසන්නේ.
ඒ, අනුව නැවත දැනුම් දෙනතුරු කන්කසන්තුරය සිට ත්‍රිකුණාමලය හරහා මඩකලපුව දක්වා වෙරළට ඔබ්බෙන් වන නොගැඹුරු මුහුදු ප්‍රදේශ ආශ්‍රිතව ධීවර සහ නාවික කටයුතුවලන් වැළකී සිටින ලෙස ද ධීවර හා නාවික ප්‍රජාවට දැනුම් දෙනවා.
එම දෙපාර්තමේන්තුව දැනුම් දෙන්නේ, ගාල්ල සිට හම්බන්තොට හරහා පොතුවිල් දක්වා වෙරළට ඔබ්බෙන් වන නොගැඹුරු මුහුදු ප්‍රදේශ ආශ්‍රිතව ධීවර සහ නාවික කටයුතුවල යෙදෙන ප්‍රජාව ද මේ පිළිබඳව අවධානයෙන් පසුවන ලෙසයි.
දිවයින වටා මුහුදු ප්‍රදේශවල සුළගේ වේගය ද විටින් විට පැයට කිලෝ මීටර් 50 සිට 60 පමණ දක්වා ඉහළ යා හැකි අතර, ගිගුරුම් සහිත වැසි ඇති වනවිට එම මුහුදු ප්‍රදේශවල තාවකාලිකව තද සුළං ඇති විය හැකි බවත් දැනුම් දෙනවා.
එම අවස්ථාවල අදාළ මුහුදු ප්‍රදේශ තාවකාලිකව ඉතා රළු විය හැකි බව කාලගුණ විද්‍යා දෙපාර්තමේන්තුව දැනුම් දෙන්නේ.
මේ අතර “මොන්තා” සුළි කුණාටුව හේතුවෙන්, බස්නාහිර, සබරගමුව, මධ්‍යම, දකුණ, උතුරු, උතුරු මැද සහ වයඹ පළාත්වලත්, ත්‍රීකුණාමලය සහ මඩකලපුව දිස්ත්‍රික්ක වලත් විටින් විට හමන පැයට කිලෝ මීටර් 50-60 ක පමණ තද සුළං ඇතිවිය හැකි බව අවවාදාත්මක නිවේදනයක් නිකුත් කරමින් කාලගුණ අංශ පවසනවා.
