පාබල හමුදාවේ බ්රිගේඩියර් චන්දන රණවීර මහතා මේජර් ජනරාල් ධුරයට උසස් කිරීම සඳහා ජනාධිපතිවරයා වෙත නිර්දේශ ඉදිරිපත් කරන ලෙස අභියාචනාධිකරණය අද යුද හමුදාපතිවරයා වෙත නියෝගයක් නිකුත් කර තිබෙනවා.
එසේම පෙත්සම්කාර බ්රිගේඩියර්වරයාට හිමිවිය යුතු හිඟ දීමනා සහ වැටුප් වර්ධක ලබා දීමට කටයුතු කරන ලෙසටයි අධිකරණ නියෝගයේ සඳහන් වූයේ.
බ්රිගේඩියර් චන්දන රණවීර මහතා ගොනු කර තිබූ රිට් පෙත්සමක් විභාගයට ගැනීමෙන් අනතුරුව අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ චමත් මොරායස් යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ලක් විසින් මෙම නියෝග නිකුත් කළා.
තමන් මේජර් ජෙනරාල් ධුරයට උසස් වීම සදහා සියලු සුදුසුකම් සපුරා තිබියදීත් පදනම් විරහිත චෝදනා එල්ල කර එම ධුරයට උසස් කිරීම වෙනුවෙන් ජනාධිපතිවරයා වෙත නිර්දේශ ඉදිරිපත් නොකිරීමට හමුදාපතිවරයා කටයුතු කරමින් සිටින බව පෙත්සම්කරු පවසනවා.
යුද හමුදාපතිවරයාගේ එම තීරණය බල රහිත කිරීමේ රිට් ආඥාවක් නිකුත් කරන ලෙසත් තමන්ව උසස් කිරීම සඳහා නිර්දේශ කරන ලෙසත් ඉල්ලමිනුයි පෙත්සම්කාර බ්රිගේඩියර්වරයා විසින් මෙම පෙත්සම අභියාචනාධිකරණය හමුවේ ගොනු කර තිබුණේ.
