ප්රමුඛතා හඳුනා ගනිමින් උතුරේ සෞඛ්ය සහ අධ්යාපන ගැටළු විසඳීමට කඩිනමින් මුදල් ලබා දෙන බව ජනාධිපති රනිල් වික්රමසිංහ මහතා පවසනවා.
ඒ යටතේ යාපනයේ ශික්ෂණ රෝහල සඳහා ඉඩම් වෙන්කර දීමටත්, ගුරු පුරප්පාඩුවලට බඳවා ගැනීම් සඳහා මුදල් වෙන් කිරීමටත් පියවර ගන්නා බවයි ජනාධිපතිවරයා ප්රකාශ කළේ.
ජනාධිපති රනිල් වික්රමසිංහ මහතා මේ බව සඳහන් කර සිටියේ සෞඛ්ය හා අධ්යාපන ක්ෂේත්රයේ නියෝජිතයන් සහ තරුණ ප්රජාව සමඟ යාපනය දිස්ත්රික් ලේකම් කාර්යාලයේදී ඊයේ (06) පැවති සාකච්ඡාවකට එක්වෙමින්.
සෞඛ්ය ක්ෂේත්රය, අධ්යාපන ක්ෂේත්රය සහ තරුණ ප්රජාව නියෝජනය කරමින් 300කට ආසන්න පිරිසක් මීට එක්ව සිටී අතර ඔවුන් ඉදිරිපත් කළ ගැටළුවලට ජනාධිපතිවරයා පිළිතුරු ලබා දෙනු ලැබුවා.
උතුරු පළාත ජාතික ආර්ථිකයට සම්බන්ධ කර ගැනීමට අවශ්ය සෑම සහයක්ම ලබාදෙන බව මෙහිදී පැවසූ ජනාධිපතිවරයා ඒ සඳහා රාජ්ය නිලධාරීන් ලෙස සහ තරුණ ප්රජාව ලෙස තම දායකත්වය ලබාදෙන ලෙසටයි ඔවුන්ගෙන් ඉල්ලා සිටියේ.
යාපනය විශ්වවිද්යාලයේ පවතින අඩුපාඩු සහ එහි භෞතික සම්පත් සහ මානව සම්පත් වැඩිදියුණු කිරීමට අදාළ යෝජනාවලියක් ද මෙහිදී යාපනය විශ්වවිද්යාලයේ ජ්යෙෂ්ඨ මහාචාර්යවරියක විසින් ජනාධිපතිවරයා වෙත භාර දී තිබෙනවා.
මෙම සාකච්ඡාවෙන් අනතුරුව යාපනය රියො අයිස් ක්රීම් වෙළඳසැලට පැමිණි ජනාධිපතිවරයා අයිස් ක්රීම් රස බැලීමට ද අමතක කළේ නැහැ.
meet-and-greet නමින් සංවිධානය කර තිබු මෙම අවස්ථාවට අධ්යාපන, ක්රීඩා, නාට්ය හා චිත්රපට කලාව, සමාජ මාධ්ය යන ක්ෂේත්ර ඔස්සේ උතුරු පළාත තුළ විශිෂ්ඨතා දැක්වූවන් පිරිසක් ද එක්ව සිටී අතර ඔවුන් සමග සුහද කථා බහක නිරත වු ජනාධිපතිවරයා සුබපැතුම් ද පිරිනමනු ලැබුවා.
