උතුරු, උතුරු මැද සහ නැගෙනහිර පළාත්වල (19) දිනයේ වැසි වාර කිහිපයක් ඇති විය හැකි බව කාලගුණ විද්‍යා දෙපාර්තමේන්තුව දැනුම් දෙනවා.
එමෙන්ම බස්නාහිර, සබරගමුව, දකුණු සහ ඌව පළාත්වලත් නුවර එළිය දිස්ත්‍රික්කයේත් අද (19) පස්වරු 1.00 න් පමණ පසුව තැනින් තැන වැසි හෝ ගිගුරුම් සහිත වැසි ඇති විය හැකි බවයි එම දෙපාර්තමේන්තුව සඳහන් කළේ.
සබරගමුව, මධ්‍යම, ඌව සහ දකුණු පළාත් වල ඇතැම් ස්ථානවල අළුයම් කාලයේදී මීදුම් සහිත තත්ත්වයක් පැවතිය හැකියි.
මේ අතර දිවයින ආශ්‍රිතව පැවති අඩු පීඩන කලාපය දිවයිනෙන් ඉවතට ගමන් කරමින් පවතින අතර දිවයිනේ කාලගුණය කෙරෙහි එම පද්ධතියේ බලපෑම ක්‍රමයෙන් අඩු වෙමින් පවති බවයි කාලගුණ විද්‍යා දෙපාර්තමේන්තුව නිවේදනය කළේ.
එමෙන්ම ලබන 22 දින පමණ වන විට ගිනිකොණ දිග බෙංගාල බොක්ක මුහුදු ආශ්‍රිතව නව අඩු පීඩන කලාපයක් නිර්මාණය වීමේ හැකියාව පවතින බවයි එම දෙපාර්තමේන්තුව දැනුම් දෙන්නේ.
පසුව එම පද්ධතිය තවදුරටත් වර්ධනය වෙමින් ශ්‍රී ලංකාවේ උතුරු වෙරළට ආසන්නව ගමන් කරනු ඇතැයි බලාපොරොත්තු වනවා.
ධීවර සහ නාවික ප්‍රජාවන්, සහ උතුරු සහ නැගෙනහිර පළාත් වල වෙසෙන මහජනතාවගෙන් මේ සම්බන්ධයෙන් කාලගුණ විද්‍යා දෙපාර්තමේන්තුව විසින් නිකුත් කරනු ලබන අනාවැකි සහ නිවේදන පිළිබඳව අවධානයෙන් පසුවන ලෙස ඉල්ලා සිටිනවා.
