දිවයිනට බලපා ඇති අධික වැසි සහිත කාලගුණ තත්ත්වයත් සමඟ ගංඟා ආශ්‍රිත පහත් බිම්වල ගංවතුර තත්ත්වයක් ඇති වීමේ අවදානමක් පවතින බව වාරිමාර්ග දෙපාර්තමේන්තුව පවසනවා.
ඒ, අනුව ඉදිරි දිනවල තද වැසි ඇති වුවහොත් මහවැලි, කැළණි, ගිං, කළු, නිල්වලා, බෙන්තර ගංඟා මෙන්ම දරු ඔය, අත්තනගලු ඔය, මා ඔය, කලා ඔය, කිරම ඔය සහ මල්වතු ඔය ආශ්‍රිත පහත් බිම්වල ගංවතුර තත්ත්වයක් අපේක්ෂා කළ හැකි බවයි වාරිමාර්ග දෙපාර්තමේන්තුව සඳහන් කළේ.
මේ අතර වාරිමාර්ග දෙපාර්තමේන්තුව වැඩිදුරටත් සඳහන් කළේ එම දෙපාර්තමේන්තුව මඟින් පාලනය වන ජලාශවල ජල ධාරිතාව 75% ඉක්මවා ඇති බවයි.
ඒ, අනුව අනුරාධපුර දිස්ත්‍රික්කයේ රාජාංගණය සහ අංගමුව යන ජලාශවල වාන් දොරටු මේ වනවිටත් විවෘත කර ඇති බව වාරිමාර්ග දෙපාර්තමේන්තුවේ වාරිමාර්ග අධ්‍යක්ෂ එස්.පී.සී. සුගීෂ්වර පවසනවා.
මේ අතර, කල්පිටිය සිට කොළඹ ගාල්ල සහ හම්බන්තොට හරහා පොතුවිල් දක්වා වන මුහුදු ප්‍රදේශවල සුළගේ වේගය පැයට කිලෝ මීටර් 50 සිට 60 දක්වා වැඩිවන අතර එම මුහුදු ප්‍රදේශ විටින් විට රළු විය හැකි බව කාලගුණ විද්‍යා දෙපාර්තමේන්තුව දැනුම් දෙනවා.
ඒ, අනුව මේ පිළිබඳව අවදානයෙන් කටයුතු කරන ලෙසයි ධීවර සහ නාවික ප්‍රජාවගෙන් ඉල්ලා සිටින්නේ.
