පරිසරය, කෘෂිකර්මය සහ සම්පත් තිරසාරත්වය පිළිබඳ ආංශික අධීක්ෂණ කාරක සභාවේ සභාපති ලෙස පාර්ලිමේන්තු මන්ත්‍රී හෙක්ටර් අප්පුහාමි තේරී පත්ව තිබෙනවා.
ඒ එම කාරක සභාව ඊයේ (05) පළමුවරට පාර්ලිමේන්තුවේදී රැස් වූ අවස්ථාවේදීයි.
සභාපතිවරයාගේ නමපාර්ලිමේන්තු මන්ත්‍රී කිංස් නෙල්සන් යෝජනා කළ අතර පාර්ලිමේන්තු මන්ත්‍රී ඥානමුත්තු ශ්‍රීනේසන් විසින් එය ස්ථිර කරනු ලැබුවා.
මෙහිදී අදහස් දැක් වූ පාර්ලිමේන්තු මන්ත්‍රී හෙක්ටර් අප්පුහාමි, තමන්ව සභාපතිවරයා ලෙස තෝරාපත්කර ගැනීම පිළිබඳව ස්තූතිය පළකළ කර සිටියා.
ලෝක පරිසර දිනය යෙදී තිබූ ඊයේ (05) දිනයේ කාරක සභාවට අදහස් දැක්වූ සභාපතිවරයා ශ්‍රී ලංකාවේ පරිසර පද්ධතිය ආරක්ෂා කරගැනීම උදෙසා ජාත්‍යන්තර සහයෝගය ද ඇතිව ගත හැකි උපරිම ක්‍රියාමර්ග ගැනීමට අපේක්ෂා කරන බව පැවසුවා.
එමෙන්ම කෘෂිකර්මාන්තය තවදුරටත් නගාසිටුවීමට අදාළ යහපත් ක්‍රියාමාර්ග මෙම කාරක සභාව ඔස්සේ ගැනීමට බලාපොරොත්තු වන බවත්, ඒ වෙනුවෙන් සියලුම පාර්ශ්වවල සහාය අපේක්ෂා කරන බවත් පවසා සිටියා.
මෙම කාරක සභාව ඔස්සේ රට නිවැරදි දිශානතියක් කරා රැගෙන යාමට අවශ්‍ය සියලුම ක්‍රියාමාර්ග ගැනීමට බලාපොරොත්තු වන බවත් කාරක සභා සභාපතිවරයා වැඩිදුරටත් අදහස් දක්වමින් පැවසුවා.
මෙම රැස්වීම සඳහා කාරක සභා සාමාජික මන්ත්‍රීවරයන් ඇතුළු පාර්ලිමේන්තු නිලධාරීන් පිරිසක් සහභාගී වී සිටියා.
