නීතිවිරෝධී ලෙස මෙරටට ගෙන ආ විදෙස් මත්පැන් බෝතල් තොගයක් සහ දුම්වැටි තොගයක් සමඟ ව්‍යාපාරිකයින් තිදෙනෙක් ඊයේ (09) රාත්‍රියේ කටුනායක ගුවන් තොටුපොළේ දී අත්අඩංගුවට ගෙන තිබෙනවා.
මෙම සැකකරුවන් තිදෙනා විසින් නීතිවිරෝධීව මෙරටට රැගෙන ආ මෙම මත්පැන් සහ දුම්වැටි තොගය ගුවන් තොටුපොළේ
‘හරිත මාවත’ ඔස්සේ රට තුළට රැගෙන යෑමට උත්සාහ කිරීමේ දී ගුවන් තොටුපොළ අපරාධ පරීක්ෂණ දෙපාර්තමේන්තු නිලධාරීන් විසින් අත්අඩංගුවට ගෙන ඇති බවයි වාර්තා වුණේ.
ඔවුන් ඊයේ (09) පස්වරු 04.30 ට ඉන්දියාවේ චෙන්නායි නුවර සිට ඉන්දීය ගුවන් සේවයට අයත් ඒ.අයි.- 281 දරණ ගුවන් යානයෙන් කටුනායක ගුවන් තොටුපොළ වෙත පැමිණ තිබෙනවා.
පසුව ඔවුන් ගුවන් තොටුපොළ සියලුම විමර්ශන කටයුතු නිමකර ගුවන් තොටුපොළ හරිත මාවත ඔස්සේ ගුවන් තොටුපොළෙන් පිටවීම සදහා ගමන් කරමින් සිටිය දී මොවුන් සම්බන්ධයෙන් සැක සිතූ අපරාධ පරීක්ෂණ දෙපාර්තමේන්තු නිලධාරීන් ඔවුන්ව පරික්ෂා කිරීමේ දී මෙම මත්පැන් සහ දුම්වැටි තොගය සොයාගැනීමට හැකිව ඇති බවයි වාර්තා වන්නේ.
මෙම සැකකරුවන් තිදෙනාගේ ගමන් මළු තුළ ලීටර් එකේ ලේබල් 05 වර්ගයේ විස්කි බෝතල් 124ක් සහ විදෙස් නිෂ්පාදිත දුම්වැටි 1,800ක් අඩංගු දුම්වැටි කාටූන් 09ක් සඟවා තිබිය දී සොයා ගැනීමට හැකිව තිබෙනවා.
අත්අඩංගුවට ගැනුණු සැකකරුවන්ගෙන් එක් අයෙක් 30 හැවිරිදි වියේ පසුවන කොළඹ – 14 ප්‍රදේශයේ පදිංචිකරුවෙක් වන අතර, අනෙක් සැකකරුවන් දෙදෙනා 38 හැවිරිදි කොළඹ 12 සහ 52 වියේ පසුවන හැටන් ප්‍රදේශයේ පදිංචිකරුවෙක් බවයි වාර්තා වුණේ.
අත්අඩංගුවට ගැනුණු විස්කි බෝතල් සහ දුම්වැටි තොගය සමඟ ව්‍යාපාරිකයන් තිදෙනා වැඩිදුර විමර්ශන කටයුතු සදහා කටුනායක ගුවන් තොටුපොළ රේගු නිලධාරීන් වෙත භාර දීමටයි කටයුතු කර ඇත්තේ.
