ධීවර හා නාවික ප්‍රජාවට අනතුරු ඇඟවීමක් – අනතුරු ඇඟවීමේ නිවේදන තවදුරටත් ක්‍රියාත්මකයි (වීඩියෝ)

ඉදිරි දින කිහිපයේදී ඇදහැලෙන අධික වර්ෂාපතනයේ අඩුවීමක් දක්නට ලැබෙන බවත්; කාලගුණය යහපත් වීමේ ඉඩකඩක් පවතින බව කාලගුණ විද්‍යා දෙපාර්තමේන්තුව පවසනවා.

කාලගුණ විද්‍යා දෙපාර්තමේන්තුවේ අනාවැකි අංශයේ නියෝජ්‍ය අධ්‍යක්ෂ ජනරාල් මෙරිල් මෙන්ඩිස් මහතා පැවසුවේ; අද (16) දිනයේ දී දිවයිනේ බස්නාහිර, සබරගමුව, වයඹ පළාත්වලටත්, ගාල්ල හා මාතර යන දිස්ත්‍රික්කවලටත් විටින් විට වර්ෂාව ඇදහැලීමේ ප්‍රවණතාවක් පවතින බවයි.

එමෙන්ම බෙංගාල බොක්ක සීමාවේ ඇති ව තිබෙන අඩු පීඩන කලාපය වර්ධනය වීම හේතුවෙන් තවදුරටත් උතුරු පළාතට තද වැසි ඇති වීමේ හැකියාවක් ඇති බව ද වාර්තා වනවා.

මඩකලපුව සිට ත්‍රිකුණාමලය, කන්කසන්තුරය හරහා මන්නාරම අවට මුහුදු කලාපත්, පුත්තලම සිට කොළඹ ,ගාල්ල හරහා හම්බන්තොට කලාපවලත් ධීවර හා නාවික කටයුතුවල යෙදෙන ප්‍රජාව දැඩි අවධානයෙන් කටයුතු කරන ලෙසට ද කාලගුණ විද්‍යා දෙපාර්තමේන්තුව අවවාදාත්මක නිවේදනයක් නිකුත් කර තිබෙනවා.

එම මුහුදු ප්‍රදේශවල මුහුදු රළ මීටර් 2 -2.5ත් අතර අගයක උසට වර්ධනය විය හැකි බව ද වාර්තා වනවා.

මේ අතර ගංවතුර අවදානම්, නායයෑම් සම්බන්ධයෙන් ආපදා කළමනාකරණ මධ්‍යස්ථානය ද නිවේදනයක් නිකුත් කර තිබෙනවා.

ඉදිරි පැය 24ක කාලය තුළ උතුරු ප්‍රදේශයට ඇතුළු ව බොහෝ ප්‍රදේශවලට මිලිමීටර් 50 ඉක්ම වූ වැසි ඇතිවීමේ හැකියාවක් ඇති බව ආපදා කළමනාකරණ මධ්‍යස්ථානයේ නියෝජ්‍ය අධ්‍යක්ෂ ප්‍රදීප් කොඩිප්පිලි මහතා පවසනවා.

එබැවින් අනතුරු ඇඟවීමේ නිවේදන තවදුරටත් ක්‍රියාත්මක බවයි ඒ මහතා මහජනතාවට දැනුම්දෙන්නේ.