ඉදිරි පාදයේ විශාල තුවාලයක් සහිතව කහල්ල පල්ලෙකැලේ අභය භූමියේ සැරිසරන වන අලියකු නිර්වින්දනය කර ප්‍රතිකාර කිරීමට වනජීවී නිලධාරීන් අද (26) කටයුතු කළා.
ගල්කිරියාගම වනසත්ව අඩවියට අයත් පලාගල කුරුප්පුවැව ඉස්මත්ත ප්‍රදේශයේදී යි එම අලියාට ප්‍රතිකාර කරනු ලැබුවේ.
මෙලෙස ප්‍රතිකාර කරනු ලැබූ වන අලියා වයස අවුරුදු 40ක් පමණ වන අතර උස අඩි 09ක් පමණ වන බව සඳහන්.
නිකවැරටිය වනජීවී පශු වෛද්‍ය ඒකකයේ පශු වෛද්‍යවරුන් ඇතුලු එම ඒකකයේ නිලධාරීන් පිරිසක් අලියාට අවශ්‍ය ප්‍රතිකාර ලබා දීමට කටයුතු කරනු ලැබුවා.
ගල්කිරියාගම වනසත්ව අඩවි ආරක්ෂක කාර්යාලයේ නිලධාරීන් පිරිසක් මෙන්ම ප්‍රදේශවාසීන් පිරිසක්ද එම කටයුතු සඳහා සහාය දැක්වූ බවයි අප වාර්තාකරු සඳහන් කළේ.
පැවැති තත්ත්වය අනුව ප්‍රතිකාර සඳහා අලියා නිර්වින්දනය කිරීමට අවශ්‍ය බව වනජීවී පශු වෛද්‍යවරයා තීරණය කිරීම හේතුවෙන් වන අලියා නිර්වින්දනය කිරීමට වනජීවී නිලධාරීන් කටයුතු කරනු ලැබුවා.
ඒ සඳහා වනජිවි නිලධාරීන්ට මහත් වෙහෙසක් දැරිමට සිදු වූ බවයි වාර්තා වන්නේ.
එලෙස වන අලියා නිර්වින්දනය කිරීමෙන් අනතුරුව ප්‍රතිකාර කටයුතු ආරම්භ වූ අතර මෙම අලියාගේ ඉදිරි පාදයක පහළ කොටසේ විශාල තුවාලයක් හටගෙන ඇති බව සඳහන්.
කාලයකට පෙර සිදුව ඇති වෙඩි වැදීමකින් එම තුවාලය හටගන්නට ඇති බවටයි වන ජීවී නිලධාරින් සැක කරන්නේ.
එම තුවාලය පිරිසිදු කර බෙහෙත් ගල්වා අවශ්‍ය වෙනත් ප්‍රතිජීවක ඖෂධ වර්ගද ලබා දීමෙන් අනතුරුව එම අලියා යළිත් සිහි ගැන් වීමට වනජීවී නිලධාරීන් කටයුතු කළා.
පශු වෛද්‍යවරුන්ගේ ප්‍රතිකාර ලබමින් සිටින එම වනඅලියා මේ වනවිට කහල්ල පල්ලේකැලේ අභය භූමියේ සැරිසරමින් ගල්කිරියාගම වනසත්ව අඩවි ආරක්ෂක කාර්යාලයේ නිලධාරීන්ගේ අධීක්ෂණය යටතේ පසු වනවා.
