තද සුළං සහ රළු මුහුද ගැන අවවාදාත්මක නිවේදනයක්

තද සුළං සහ මුහුද රළු වීම පිළිබඳ කාලගුණ විද්‍යා දෙපාර්තමේන්තුවේ ස්වභාවික විපත් පිළිබඳ පූර්ව අනතුරු ඇඟවීමේ මධ්‍යස්ථානය විසින් අවවාදාත්මක නිවේදනයක් නිකුත් කර තිබෙනවා.

මධ්‍යම බෙංගාල බොක්ක මුහුදු ප්‍රදේශයේ යාත්‍රා කරන බහුදින ධීවර යාත්‍රා සඳහා අද පස්වරු 3ට මෙම නිවේදනය නිකුත් කර ඇත්තේ හෙට (17) පස්වරු 3 දක්වා වලංගු වන ආකාරයෙන්.

එහි දැක්වෙන්නේ බටහිර මධ්‍යම බෙංගාල බොක්ක ආශ්‍රිතව පිහිටා තිබූ ගැඹුරු පීඩන අවපාතය අද උදෑසන 08.30 වන විට අක්ෂාංශ 17.4N සහ දේශාංශ 87.0E ආසන්නයේ ස්ථානගතව පැවති බවයි.

එම පද්ධතිය උතුරු දෙසට බරව වයඹ දෙසට ගමන් කරමින් ක්‍රමයෙන් සුළි කුණාටුවක් දක්වා වර්ධනය වී ලබන 18 වනදා අලුයම බංග්ලාදේශ වෙරළ තීරය හරහා ගොඩබිම වෙතට ගමන් කරනු ඇති බවටයි බලාපොරොත්තු වන්නේ.

මේ හේතුවෙන් උතුරු අක්ෂාංශ 16 සහ 22ත් නැගෙනහිර දේශාංශ 85 සහ 95ත් අතර මුහුදු ප්‍රදේශවල සුළඟේ වේගය පැයට කිලෝමීටර් 50ක් 60ක් පමණ වන අතර ඇතැම් විට පැයට කිලෝමීටර් 70ක් 80ක් පමණ දක්වා වැඩි විය හැකියි.

එම මුහුදු ප්‍රදේශ රළු හෝ ඉතා රළු වන අතර තද වැසි හෝ ගිගුරුම් සහිත වැසි ද ඇතිවීමේ හැකියාවක් පවතිනවා.

උතුරු අක්ෂාංශ 16 සහ 22ත් සහ නැගෙනහිර දේශාංශ 85සහ 95ත් අතර මුහුදු ප්‍රදේශයට ඉදිරි පැය 24 තුළ යාත්‍රා නොකරන ලෙසටයි ධීවර සහ නාවික ප්‍රජාවට දැනුම් දෙන්නේ.

දැනට මෙම මුහුදු ප්‍රදේශවල ධීවර කටයුතුවල යෙදී සිටින පිරිස වහාම ගොඩබිමට හෝ ආරක්ෂිත ස්ථානයක් වෙත පැමිණෙන ලෙසට දැනුම්දී තිබෙනවා.

එමෙන්ම කාලගුණ විද්‍යා දෙපාර්තමේන්තුව මගින් මේ සම්බන්ධව නිකුත් කරන ඉදිරි නිවේදන පිළිබඳ සිය අවධානය යොමු කරන ලෙසටයි ධීවර සහ නාවික ප්‍රජාවගෙන් ඉල්ලීමක් කෙරෙන්නේ.