දේවගැති ජෙරොම් ප්‍රනාන්දුට එරෙහිව මුදල් විශුද්ධිකරණය වැළැක්වීමේ පනත යටතේ විමර්ශනයක් සිදුකෙරෙන බව නීතිපතිවරයා අභියාචනාධිකරණය හමුවේ දැනුම් දුන්නා.
තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා දේවගැති ජෙරොම් ප්‍රනාන්දු විසින් ගොනු කළ රිට් පෙත්සම අද සලකා බැලීම සඳහා කැදවනු ලැබූ අවස්ථාවේදී යි නීතිපතිවරයා වෙනුවෙන් පෙනී සිටි ජේෂ්ඨ රජයේ නීතිඥ ෂමින්ද වික්‍රම මහතා මෙම දැනුම් දීම සිදු කළේ.
මෙම පෙත්සම අද සෝභිත රාජකරුණා සහ ඒ. මරික්කාර් යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල ඉදිරියේ කැඳවනු ලැබුවා.
එහිදී නීතිපතිවරයා වෙනුවෙන් පෙනී සිටි ජ්‍යෙෂ්ඨ රජයේ නීතිඥ ෂමින්ද වික්‍රම මහතා මූලික විරෝධතා මතු කරමින් ඉල්ලා සිටියේ අදාළ පෙත්සම විභාගයට නොගෙන නිෂ්ප්‍රභ කරන ලෙසටයි.
ජ්‍යෙෂ්ඨ රජයේ නීතිඥවරයා කියාසිටියේ මෙම පෙත්සම තුළින් පෙත්සම්කරු අධිකරණයට කරුණු වසන් කිරීම මෙන්ම අධිකරණය නොමග යවන කරුණු ඉදිරිපත් කර ඇති බවයි.
මාධ්‍ය වාර්තා පදනම් කරගෙන තමාව අත් අඩංගුවට ගැනීමේ සූදානමක් පවතින බව පෙත්සම්කරු සිය පෙත්සමේ සඳහන් කර තිබෙනවා. ඔහු සම්පූර්ණයෙන්ම පදනම් වී සිටින්නේ මාධ්‍ය වාර්තා මතයි. පෙත්සම්කරු මෙම ඉල්ලීම ඇතුළත් මූලික අයිතිවාසිකම් පෙත්සමක් ශ්‍රේෂ්ඨාධිකරණය හමුවේ ගොනු කර තිබුනත් එම කරුණ මෙම පෙත්සමේ වසන් කර තිබෙන බවත් ජේෂ්ඨ රජයේ නීතිඥවරයා අධිකරණයට දන්වා සිටියා.
වැඩි දුරටත් කරුණු දැක්වූ ජේෂ්ඨ රජයේ නීතිඥ වරයා මෙම පෙත්සම්කරු සම්බන්ධයෙන් මුදල් විශුද්ධිකරණය සම්බන්ධයෙන් පරීක්ෂණයක් සිදු කෙරෙන බවත් ප්‍රකාශ කළා.
මෙම පෙත්සම තුළින් පෙත්සම්කරුගේ ද්වේශ සහගත ක්‍රියා කලාපය අනාවරණය වන බවත් එබැවින් එය විභාගයට ගැනීම සඳහා නොතීසි නිකුත් කිරීමකින් තොරව නිෂ්ප්‍රභ කරන ලෙසත් ජේෂ්ඨ රජයේ නීතිඥ ෂමින්ද වික්‍රම මහතා අධිකරණයෙන් ඉල්ලා සිටියා.
ඉන් අනතුරුව අතරමැදි ඉල්ලීමක් ඉදිරිපත් කල පූජ්‍ය ඇල්ලේ ගුණවංශ, බෙංගමුවේ නාලක හිමිවරු ඇතුළු පිරිසක් වෙනුවෙන් පෙනී සිටි ජනාධිපති නීතිඥ සංජීව ජයවර්ධන මහතා අධිකරණය හමුවේ කරුණු දක්වමින් කියාසිටියේ ආගම්වලට අපහාසාත්මක ප්‍රකාශයක් සිදු කිරීම සම්බන්ධයෙන් මෙම පෙත්සම්කරු අත්අඩංගුවට ගෙන නීතිය ක්‍රියාත්මක කරන ලෙස නියෝගයක් නිකුත් කරන ලෙස ඉල්ලා තම සේවාදායක හිමිවරු ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ගොනු කර තිබූ බවයි.
එය කැඳවූ අවස්ථාවේදී නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල්වරයා අධිකරණය හමුවේ කරුණු දක්වමින් මෙම පෙත්සම්කරු සම්බන්ධයෙන් දණ්ඩ නීති සංග්‍රහය සහ සිවිල් හා දේශපාලන අයිතිවාසිකම් පිළිබඳ සම්මුති පනත යටතේ විමර්ශනයක් සිදුකරන බව දැනුම් දී තිබු බවත් ජනාධිපති නීතිඥවරයා පැවසුවා.
එම කරුණු මෙම පෙත්සම තුළින් පෙත්සම්කරු වසන් කර ඇතැයි චෝදනා කල ජනාධිපති නීතිඥවරයා මෙය අධිකරණ බලය අයුතු ලෙස පරිහරණය කිරීමට ගත් උත්සාහයක් ලෙසටයි සඳහන් කළේ.
එබැවින් මෙම පෙත්සම මුල් අවස්ථාවේදීම නිෂ්ප්‍රභ කරන ලෙසත් ජනාධිපති නීතිඥ සංජීව ජයවර්ධන මහතා අධිකරණයෙන් ඉල්ලා සිටියා.
ඉන් අනතුරුව පෙත්සම වැඩිදුර සලකා බැලීම ලබන 19 වනදා දක්වා කල් තැබුණු අතර එදින පෙත්සම්කාර දේවගැතිවරයා වෙනුවෙන් ජනාධිපති නීතිඥ ජගත් වික්‍රමනායක මහතා කරුණු ඉදිරිපත් කිරීමට නියමිතයි.
