අද (26) දිනයේත් ගෑස් මිලදී ගැනීම සඳහා ප්‍රදේශ රැසක දිගු පෝලිම් දක්නට ලැබුණි. මේ අතර බණ්ඩාරවෙල දිසා රෝහල අසල ගෑස් අලෙවිසැළට අද අලුයම ගෑස් සිලින්ඩර 50ක් ලැබී තිබුණි. නමුත් එම සිලින්ඩර පැමිණ සිටි පිරිසට ප්‍රමාණවත් නොවීම හේතුවෙන් ජනතාව කුපිතවීමෙන් එම ස්ථානයේ නොසන්සුන් තත්ත්වයක් ඇති විය.
ඒ අතරවාරයේ තවත් පිරිසක් වෙළෙඳසැළට ගල් ප්‍රහාර එල්ල කිරීමත් සමග වෙළෙඳසැලේ හිමිකරුගේ බිරිඳට තුවාල සිදුවී තිබේ. ඇය මේ වනවිට බණ්ඩාරවෙල දිසා රෝහලේ ප්‍රතිකාර ලබමින් පසුවෙයි.
“ගෑස් ඉවර වුණා. ඇවිත් හිටිය පිරිස් කෑ ගහන්න ගත්තා ගෑස් හංගගෙන කියලා. ඒත් එක්කම ගල් පහරක් ආවා.. කවුරු කොහෙන් ගැහුව ද කියලා හිතා ගන්න බැරි වුණා,” සිද්ධියෙන් තුවාල ලැබූ කාන්තාව පැවසීය.
ගෑස් ලොරියක් පැමිණෙන තුරු ගාල්ල ඔරොප්පුවත්ත ප්‍රදේශයේ ලිට්‍රෝ ගෑස් අලෙවිසැළ අසල රැඳීසිටි ජනතාව ඊයේ රාත්‍රිය පහන් කර තිබුණේ පෝලිම්වල සිටය.
