පසුගිය පෙබරවාරි මස 19 වැනි දින කොළඹ මහේස්ත්‍රාත් අධිකරණය තුළ දී ඝාතනයට ලක් වූ ප්‍රබල පාතාල කල්ලි සාමාජිකයෙකු යැයි කියන ගනේමුල්ල සංජීව හෙවත් සංජීව කුමාර සමරරත්න නමැත්තාට වෙඩි තැබීමේ සිද්ධියේ ප්‍රධාන වෙඩික්කරු යැයි පැවසෙන සැකකරු ව ජුනි මස 04 වැනි දින තෙක් යළිත් රක්ෂිත බන්ධනාගාරගත කිරීමට කොළඹ ප්‍රධාන මහේස්ත්‍රාත් තනූජා ලක්මාලි නියෝග කළා.
අද (21) දහවල් ප්‍රධාන වෙඩික්කරු යැයි සැලකෙන සමිඳු දිල්ෂාන් පියුමංග නමැත්තාව සහ ඔහුට අපරාධය කිරීමෙන් පසු ව පලා යාමට සහාය දුන් වෑන් රථයේ රියදුරු වන මහේෂ් සම්පත් නමැත්තාව මහේස්ත්‍රාත්වරියගේ නිල මැදිරියේ දී අධිකරණයට ඉදිරිපත් කිරීමේදියි මෙම නියෝගය ලබා දුන්නේ.
මීට අමතර ව අපරාධයට ආධාර අනුබල දුන් වෑන් රථයේ රියදුරු මේ මස 23 වැනි දින තෙක් රිමාන්ඩ් භාරයට පත් කිරීමට ද නියෝග කෙරුණා.
එමෙන්ම සැකකරුවන් වෙනුවෙන් පෙනී සිටි නීතිඥවරුන් අධිකරණයෙන් ඉල්ලා සිටියේ තම සේවාදායකයින්ට බන්ධනාගාරය තුළ ආරක්ෂාව ලබාදීමේ නියෝගයක් නිකුත් කරන ලෙසයි.
එහිදී මහේස්ත්‍රාත්වරිය විසින් බන්ධනාගාර නිලධාරීන්ට නියෝග කළේ අදාළ සැකකරුවන් හට බන්ධනාගාරය තුළ අවශ්‍ය ආරක්ෂාව තර කරන ලෙසටයි.
