කොළඹ – 07 , බාන්ස් පෙදෙසේ රුපියල් කෝටි ගණනක් වටිනා ඉඩමක් අත්පත් කර ගැනීම සඳහා පාතාල ක්‍රියාකාරීන් පිරිසක් කටයුතු කරමින් සිටින බවට දසත නිවුස් වෙත තොරතුරු වාර්තා වනවා.
ඊට නියෝජ්‍ය පොලිස්පතිවරයෙකුගේ සහ විශ්‍රාමික මහාධිකරණ විනිසුරුවරයෙකුගේ මැදිහත්වීමක් ඇතැයි ද සඳහන්.
කොළඹ 07, බාන්ස් පෙදෙසේ පිහිටා ඇති මෙම නිවස සහිත ඉඩම අක්කර ½ ක පමණ වපසරියකින් යුතුයි.
මීට මාස 6 කට පමණ ඉහතදී දේපල අත්පත් කර ගැනීම සඳහා පැමිණි දෙපිරිසක් අතර නොසන්සුන්තාවක් ඇතිව තිබු අතර කුරුඳුවත්ත පොලිසිය පුද්ගලයන් 26 දෙනෙකු අත්අඩංගුවට ගෙන අධිකරණයට ඉදිරිපත් කළා.
ඊයේ දිනයේ ද යළි මෙම නිවස අත්පත් කර ගැනීමට පුද්ගලයන් පිරිසක් පැමිණ තිබුණා.
මොවුන්ගේ පාතාල ක්‍රියාකාරකම් සඳහා නියෝජ්‍ය පොලිස්පතිවරයෙකුගේ ද සහය ලැබී ඇති බවට චෝදනා එල්ල වනවා.
බලහත්කාරයෙන් මේ වනවිට රැඳී සිටින පිරිස මෙම නිවසේ හිමිකාරීත්වය කියාපෑමට හැඳුනුම්පතක් ද ඉදිරිපත් කර ඇති නමුත් මේ වනවිට අදාල හැඳුනුම්පත ව්‍යාජ තොරතුරු ලබා දී සකසන ලද්දක් බව හෙළිව තිබෙනවා.
ඒ අනුවයි මහනුවර කඩවත් සතර සහ ගඟවට කෝරළේ ප්‍රාදේශීය ලේකම්වරයා විසින් අදාල හැඳුනුම්පත අවලංගු කරන ලෙස පුද්ගලයින් ලියාපදිංචි කිරීමේ කොමසාරිස්වරයා වෙත ලිපියක් මගින් දැනුම් දී ඇත්තේ.
මේ සම්බන්ධයෙන් අප කළ විමසීමකදී පොලිසියේ උසස් නිලධාරියෙකු පැවසුවේ අනවසරයෙන් නිවසේ රැඳී සිටි පුද්ගලයන් 08 දෙනෙකු අත්අඩංගුවට අධිකරණයට ඉදිරිපත් කිරීමට කටයුතු කළ බවයි.
අනේ වැ.බ.පො.ප… ඔන්න ඉන්නවා අල්ලන්න ඕන පාතාල කාරයෝ.. බොරුවට පාරෙ යන මිනිස්සුන්ගේ ඔලු කටු කුඩු කරලා නාටක පෙන්වන වෙලේ.. මේ ඉන්නෙ අතේම බඩු.. අල්ලන්නකෝ දෙයියනේ..