වත්මන් ආර්ථික අර්බුදයට වගකිව යුතු පුද්ගලයින්ට එරෙහිව විමර්ශනයක් සිදුකරන ලෙස නියෝගයක් නිකුත් කරන්නැයි ඉල්ලා හිටපු ජනාධිපති ගෝඨාභය රාජපක්ෂ, ඔහුගේ රජයේ මුදල් අමාත්යවරුන් වශයෙන් කටයුතු කළ මහින්ද රාජපක්ෂ, බැසිල් රාජපක්ෂ ඇතුළු පිරිසකට එරෙහිව ගොනුකර තිබෙන මූලික අයිතිවාසිකම් පෙත්සම් අද තුන්වන දිනටත් ශ්රේෂ්ඨාධිකරණය හමුවේ විභාගයට ගත්තා.
අගවිනිසුරු ජයන්ත ජයසූරිය, බුවනෙක අලුවිහාරේ, ප්රියන්ත ජයවර්ධන, විජිත් මලල්ගොඩ සහ මුර්දු ප්රනාන්දු යන මහත්ම මහත්මීන් ගෙන් සමන්විත පංච පුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ යි පෙත්සම් විභාගය පැවැත්වෙන්නේ.
මෙහිදී පෙත්සමක් ඉදිරිපත් කර තිබූ මහාචාර්ය මහිම් මෙන්ඩිස් ඇතුළු පිරිසක් වෙනුවෙන් ජනාධිපති නීතිඥ උපුල් ජයසූරිය මහතා කරුණු ඉදිරිපත් කළා.
ඔහු කියා සිටියේ ගෝඨාභය රාජපක්ෂ බලයට පැමිණි විගස රුපියල් බිලියන 600ක පමණ බදු කපා හැරීම තුළින් රාජ්ය ආදායමෙන් සියයට 35ක් පමණ අහිමි වූ බවයි.
මෙලෙස කපා දැමූ බදුවලින් සහන ලැබුණේ බහු ජාතික සමාගම්වලට බවත් සුවිශාල සමාගම්වල ලාභ මේ හේතුවෙන් කැපී පෙනෙන ආකාරයෙන් ඉහළ ගිය බවත් ඔහු සඳහන් කළා.
මෙම බදු සහනය තුළින් සාමාන්ය ජනතාවට කිසිදු යහපතක් නොවූ බව සඳහන් කළ ජනාධිපති නීතිඥවරයා කියාසිටියේ රජයේ විගණකාධිපතිවරයා විසින් අධිකරණයට ඉදිරිපත් කර තිබෙන වාර්තාවේ ද මේ බව සඳහන් කර ඇති බවයි.
මෙම බදු කපා හැරීමේ තීරණයට අමාත්ය මණ්ඩලයේ විධිමත් අනුමැතියක් ලබාගෙන නොතිබූ බවත් ඔහු පැවසුවා.
කොවිඩ් වසංගතයෙන් පසුව ජාත්යන්තර මූල්ය අරමුදල විසින් රටවල් 90කට පමණ සහන සලසාදීමට කටයුතු කළත් එම සහනය ශ්රී ලංකාවට ලබා ගැනීමට නොහැකි වූයේ වගඋත්තරකරුවන්ගේ අත්තනෝමතික සහ වගකීම් විරහිත ක්රියාකලාපය නිසා බවටයි ජනාධිපති නීතිඥවරයා චෝදනා කළේ.
මෙම මූල්ය තීරණ ගැනීමේ දී හිටපු ජනාධිපති ලේකම් පී. බී. ජයසුන්දර ද මැදිහත් වී ඇතැයි චෝදනා කළ ජනාධිපති නීතිඥ උපුල් ජයසූරිය මහතා කියාසිටියේ ජනාධිපති ලේකම්වරයාට රාජ්ය මූල්ය කටයුතු සඳහා මැදිහත් වීමට කිසිදු නීතිමය බලයක් නොමැති බවයි.
වත්මන් ආර්ථික අර්බුදයට වගකිව යුතු පුද්ගලයින්ට එරෙහිව විමර්ශනයක් සිදුකරන ලෙස රජය වෙත නියෝගයක් නිකුත් කරන්නැයි ඉල්ලා ශ්රී ලංකා වාණිජ මණ්ඩලයේ හිටපු සභාපති චන්ද්රා ජයරත්න, පිහිනුම් ශූරයකු වන ජුලියන් බෝලිං ඇතුළු පිරිසක් විසින් එක් මූලික අයිතිවාසිකම් පෙත්සමක් ඉදිරිපත් කර තිබෙනවා.
ඊට අමතරව කොළඹ විවෘත විශ්ව විද්යාලයේ මහාචාර්ය මහිම් මෙන්ඩිස් ඇතුළු කථිකාචාර්යවරු පිරිසක් විසින් තවත් මූලික අයිතිවාසිකම් පෙත්සම ඉදිරිපත් කළා.
මෙම පෙත්සම්වල වගඋත්තරකරුවන් ලෙස හිටපු ජනාධිපති ගෝඨාභය රාජපක්ෂ, ඔහුගේ රජයේ මුදල් අමාත්යවරුන් වශයෙන් කටයුතු කළ මහින්ද රාජපක්ෂ, බැසිල් රාජපක්ෂ, හිටපු මහ බැංකු අධිපතිවරුන් වන අජිත් නිවාඩ් කබ්රාල්, මහාචාර්ය ඩබ්ලිව් ඩී ලක්ෂ්මන්, මුදල් අමාත්යාංශයේ හිටපු ලේකම් එස්. ආර්. ආටිගල ජනාධිපති ලේකම් පී. බී. ජයසුන්දර ඇතුළු පිරිසක් නම් කර තිබෙනවා.
