මාලිම්බඩ පොලිස් වසමේ, තෙලිජ්ජවිල ප්රදේශයේ පදිංචි කුඩා පිරිමි දරුවෙකු පැහැර ගැනීමට උත්සාහ ගත් පුද්ගලයන් සිව්දෙනෙකු ගම්වාසීන්ගේ සහයෝගය මත පොලිසිය විසින් අත්අඩංගුවට ගෙන තිබෙනවා.
වයස අවුරුදු 09ක් වන මෙම පිරිමි දරුවා, තම නිවසේ සාලයේ සෙල්ලම් කරමින් සිටියදී ඉකුත් 31 මෙම සිදුවීමට මුහුණ දී ඇති බවයි පොලිසිය පවසන්නේ.
එම අවස්ථාවේදී, දරුවාගේ පියා සිය රැකියා කටයුතු සඳහා නිවසින් බැහැරව ගොස් තිබූ අතර, දරුවාගේ මව කාමරයේ ඔහුගේ බාල සහෝදරයාට මව්කිරි ලබා දෙමින් සිට තිබෙනවා.
පැහැර ගැනීමට තැත් කළ මෙම දරුවා උදැසන ආහාරය ගෙන ජලය පානය සඳහා මුළුතැන්ගෙට ගිය අවස්ථාවේ දී, නාඳුනන පුද්ගලයන් දෙදෙනෙකු නිවසට ඇතුළු වී, නිවසේ සැඟව සිට ඇති අතර ඔවුන් දරුවාගේ දෑත් රෙදි කැබැල්ලකින් ගැට ගසා දෑස් බැඳ පැහැරගෙන යාමට තැත්කර ඇති බවයි වාර්තා වන්නේ.
දරුවාගේ දැඩි ලෙස කෑ ගැසීම නිසා නිවස තුළට පැමිණි පුද්ගලයන් දරුවා දමා පලා ගොස් කැළෑබඳ ප්රදේශයක සැඟව ඇති බවයි වාර්තා වන්නේ.
මාලිම්බඩ පොලිසිය සහ ප්රදේශවාසීන් රැස්ව ප්රදේශය පුරා සෝදිසි කර මෙම සැඟව සිටි සැකකරුවන් දෙදෙනා සහ තවත් පුද්ගලයන් දෙදෙනෙකුත්, ඔවුන් පැමිණී ත්රීරෝද රථයක් සහ යතුරුපැදියක් සොයා ගැනීමට හැකිව තිබෙනවා.
අදාළ සිද්ධිය සම්බන්ධයෙන් අත්අඩංගුවට ගත් සැකකරුවන් වයස 30 – 40 අතර වයස්වල පසුවන මාලිම්බඩ, හුලංදාව යන ප්රදේශවල පදිංචිකරුවන්.
එමෙන්ම මෙම සැකකරුවන් මීට පෙරද විවිධ අපරාධවලට චෝදනා ලැබූවන් බවට මූලික විමර්ශනවලදී අනාවරණය වි තිබෙනවා.
සැකකරුවන් මාතර අධිකරණය වෙත ඉදිරිපත් කිරීමට නියමිතයි.
මාලිම්බඩ පොලිසිය විසින් වැඩිදුර විමර්ශන සිදු කරනවා.
