පාස්කු ඉරුදින ත්රස්ත ප්රහාරය සම්බන්ධයෙන් සොයා බැලූ ජනාධිපති පරීක්ෂණ කොමිසම විසින් පොලිස් නිලධාරීන්ට එරෙහිව සිදුකර තිබෙන නිර්දේශ ක්රියාත්මක කරන ලෙස නීතිපතිවරයා වෙත නියෝගයක් නිකුත් කරන්නැයි ඉල්ලා කාදිනල් මැල්කම් රංජිත් හිමිපාණන් විසින් කළ පෙත්සම සලකා බැලීම සඳහා මැයි මස 19 වනදා කැඳවන ලෙස අභියාචනාධිකරණය නියම කළා.
මෙම පෙත්සම අද සෝභිත රාජකරුණා සහ ධම්මික ගනේපොල යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල ඉදිරියේ අද කැඳවනු ලැබුවා.
එහිදී නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් රූකාන්ත අබේසූරිය මහතා අධිකරණයට දන්වා සිටියේ මෙවැනි ගැටලු සම්බන්ධයෙන් සොයා බලනු ලබන්නේ ජාතික පොලිස් කොමිසම බවත් ජාතික පොලිස් කොමිසම මෙම පෙත්සමේ සාමාජිකයෙකු වශයෙන් නම් කර නොමැති බවයි.
එමෙන්ම අදාළ පෙත්සමේ වගඋත්තරකරුවන් වශයෙන් නම් කර සිටින මහජන ආරක්ෂක අමාත්යංශයේ ලේකම් මේ වන විට වෙනස් වී ඇති බැවින් එය ද සංශෝධනය විය යුතු බවයි අතිරේක සොලිසිටර් ජෙනරාල්වරයා අධිකරණයේ අවධානය යොමු කළේ.
ඒ අනුව අදාළ ෙත්සම සංශෝධනය කිරීමට පෙත්සම්කාර පාර්ශ්වය අවසර දුන් අභියාචනාධිකරණය පෙත්සම සලකා බැලීම සඳහා මැයි මස 19 වනදා කැඳවන ලෙස නියම කළා.
මෙම පෙත්සමේ වගඋත්තරකරුවන් ලෙස පොලිස්පති වරයා බස්නාහිර පළාත භාර ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන් ජේෂ්ඨ පොලිස් අධිකාරී සිසිල කුමාර නීතිපතිවරයා ඇතුළු පිරිසක් නම් කර තිබෙනවා.
පෙත්සම්කාර කාදිනල් මැල්කම් රංජිත් හිමිපාණන් කියා සිටින්නේ පාස්කු ඉරුදින ත්රස්ත ප්රහාරය වළක්වා ගැනීමට පියවර නොගැනීම සම්බන්ධයෙන් පොලිස් නිලධාරීන් පිරිසකට එරෙහිව ඒ පිළිබඳව සොයා බැලූ ජනාධිපති පරීක්ෂණ කොමිසම විසින් නිර්දේශ ඉදිරිපත් කර ඇති බවයි.
එම නිර්දේශ මෙතෙක් ක්රියාත්මක කර නොමැති බවත් ඒවා ක්රියාත්මක කරන ලෙස නීතිපතිවරයා වෙත නියෝගයක් නිකුත් කරන ලෙසත් පෙත්සම්කාර කාදිනල් හිමියන් ඉල්ලා තිබෙනවා.
