කර්මාන්ත සහ ව්යවසායකත්ව සංවර්ධන අමාත්යාංශය යටතේ පවතින ලංකා මිනරල් සෑන්ඩ්, BCC Lanka Limited, ජාතික ලුණු සමාගම, ලංකා පොස්පේට් සමාගම සහ ලංකා කහටගහ ග්රැෆයිට් ලිමිටඩ් යන ආයතන නව රජය යටතේ ලබාගත් ලාභාංශ වලින් කොටසක් අද (07) දින පාර්ලිමේන්තුවේ දී කම්කරු අමාත්ය සහ ආර්ථික සංවර්ධන නියෝජ්ය අමාත්ය අනිල් ජයන්තට සහ මුදල් අමාත්යාංශ ලේකම් හර්ෂණ සූරියප්පෙරුමට නිල වශයෙන් භාරදෙනු ලැබුවා.
ලංකා මිනරල් සෑන්ඩ් ආයතනය වෙනුවෙන් ආයතනයේ වැඩබලන සභාපති ගයාන් වෙල්ලාල රුපියල් මිලියන 500ක මුදලක් පසුගිය මාස 09 කාලයේදී ලැබූ ලාභාංශ වලින් කොටසක් ලෙස භාණ්ඩාගාරයට ලබාදුන් අතර, මෙම වර්ෂය අවසාන වන විට රුපියල් බිලියන 05ක ආදායම් ඉලක්කවලට යාමට උත්සාහ කරන බවට ප්රකාශ කළා.
BCC Lanka Limited ආයතනය වෙනුවෙන් එහි සභාපති ප්රසන්න ඉන්ද්රජිත් රුපියල් මිලියන 50ක් තම ආයතනයේ ලාභාංශ වලින් කොටසක් ලෙස භාණ්ඩාගාරයට ලබාදුන් අතර, එහි විශේෂත්වය වන්නේ BCC ආයතනය දිගින් දිගටම පාඩු ලැබූ නිසා ඈවර කිරීමට නියමිතව තිබූ ආයතනයක් වීමයි.
එලෙසින්ම මෙම ආයතනය මේ වන විට මෙම වර්ෂය තුළ මිලියන 105ක ස්ථාවර තැන්පතු රැස්කර තිබෙනවා.
ජාතික ලුණු සමාගම වෙනුවෙන් එහි සභාපති ගයාන් වෙල්ලාලගේ රුපියල් මිලියන 100ක ලාභාංශ භාණ්ඩාගාරයට ලබාදුන් අතර, වර්ෂය මුල් භාගයේදී රට, ලුණු හිඟයකට මුහුණ දී තිබූ දුෂ්කර අවධියක් ගතකළ තත්ත්වයක ජාතිය ලුණු සමාගම ඉතිරි මාස 06ක කාලය තුළ තම සමාගම උපරිම තලයකට රැගෙන සමත් වී තිබෙනවා.
මෙහිදී අදහස් දැක්වූ සභාපතිවරයා ප්රකාශ කළේ ඉතිහාසයේ උපරිම නිෂ්පාදන ආදායමක් මෙම වර්ෂය අවසානයේ ළඟාකර ගත හැකිවනු ඇති බවයි.
ලංකා පොස්පේට් ආයතනය වෙනුවෙන් මෙම අවස්ථාවට එම ආයතනයේ සභාපති ආනන්ද ප්රේමකුමාර සහභාගි වූ අතර, ඔහු ඉදිරි සතිය තුළ රුපියල් මිලියන 100ක් භාණ්ඩාගාරය වෙත ලබාදෙන බවත්, ඉතිරි ලාභාංශ තම ආයතනයේ දියුණුව වෙනුවෙන් භාවිත කරන බවත් ප්රකාශ කළා.
ලංකා ග්රැෆයිට් ආයතනය වෙනුවෙන් එහි සභාපති P.V.A හේමලාල් මෙම අවස්ථාවට සහභාගි වූ අතර, ඔහු රුපියල් මිලියන 7.4ක මුදලක් භාණ්ඩාගාරයට මීට පෙර ලබා දී තිබුණා.
මෙහි විශේෂත්වය වන්නේ මෙම ආයතනය භාණ්ඩාගාරයට මුදල් ලබා දී තිබුණේ වසර 14 කට පසු වීමයි.
මෙම ලබාදුන් මුළු මුදල්වල එකතුව රුපියල් මිලියන 757.4ක්.
මෙම එකතුව අර්ධ වාර්ෂික ලාභාංශයකින් ලබාදුන් මුදලක් වන අතර, ඉදිරි කාලය තුළදී පූර්ණ ලාභාංශ තුළින් මුදල් ලබාදීමට හැකියාව පවතිනවා.
මෙම අවස්ථාවට කර්මාන්ත සහ ව්යවසායකත්ව සංවර්ධන අමාත්යාංශය වෙනුවෙන් අමාත්ය සුනිල් හඳුන්නෙත්ති, නියෝජ්ය අමාත්ය චතුරංග අබේසිංහ, අමාත්යාංශයේ ලේකම් තිලකා ජයසුන්දර සහ නිලධාරීන් එක්ව සිටියා.
