දෙවන ලෝක යුද්ධයේ ජපන් ප්රවාහන නෞකාවක් වූ SS Montevideo Maru හි සුන්බුන් පිලිපීනයට ඔබ්බෙන් වූ මුහුදු ප්රදේශයේදී සොයා ගෙන තිබෙනවා.
ගැඹුරු මුහුදේ සිදු කළ ගවේෂනයට එක් වූ නිලධාරීන් පැවසුවේ, 1942 වසරේ දී පිලිපීනයට ඔබ්බෙන් ඕස්ට්රේලියානු යුද සිරකරුවන් 1,000 කට ආසන්න සංඛ්යාවක් ප්රවාහනය කරමින් සිටියදී මෙම නෞකාව සබ්මැරීන ටෝපිඩෝ ප්රහාරයකින් ගිලී ගිය බවයි.
1942 වසරේ ජූලි 1 වනදා, පැපුවා නිව්ගිනියාවේ සිට චීනයේ හයිනාන් දක්වා ගමන් කරන අතරතුර, එක්සත් ජනපදයේ සබ්මැරීනයකින් නෞකාව ගිල්වනු ලැබුවා.
කෙසේවෙතත් එම නැව යුද සිරකරුවන් රැගෙන ගිය බව ඇමරිකා සබ්මැරීනයේ එහි කාර්ය මණ්ඩලය දැනුවත්ව නොසිටි බවයි වාර්තා වී ඇත්තේ. නැව ගිලා බසිනු ලැබූ ස්ථානය වසර 80 කට වැඩි කාලයක් පුරා අභිරහසක්ව පැවතුණු බව සඳහන්.
මෙම යාත්රාව කිලෝමීටර් 4ක් (සැතපුම් 2.5ක්) පමණ ගැඹුරක තිබී හමුවූ බවයි පර්යේෂණ මෙහෙයුම සංවිධානය කළ සමුද්රීය පුරාවිද්යා කණ්ඩායමක් වන සයිලන්ට්වර්ල්ඩ් පදනම ප්රකාශ කළේ.
නෞකාව ගිල්වීම ඕස්ට්රේලියාවේ දරුණුතම සමුද්ර ව්යසනය වූ අතර, අවම වශයෙන් සොල්දාදුවන් 850ක් ඇතුළුව ඕස්ට්රේලියානු පුරවැසියන් 979ක් ඉන් මරණයට පත් වුණා.
තවත් රටවල් 13ක සිවිල් වැසියන් ද නෞකාවේ සිටි අතර, මියගිය මුළු සිරකරුවන් සංඛ්යාව 1,060ක් පමණ වන බවයි සඳහන් වන්නේ.
ගවේෂකයන් අප්රේල් 6 වන දින පිලිපීනයේ ප්රධාන දූපත වන ලුසොන්ට වයඹ දෙසින් දකුණු චීන මුහුදේ සුන්බුන් සෙවීම ආරම්භ කළ අතර සෝනාර් සහිත ස්වයංක්රීය දිය යට කිමිදුම් උපකරණයක් ඇතුළු අධි තාක්ෂණික උපකරණ භාවිතා කරමින් දින 12කට පසුව නෞකාවේ සුන්බුන් සොයා ගනු ලැබුවා.
