දිවයිනේ ප්රදේශ කිහිපයක සිදුවූ රිය අනතුරුවලින් එකම පවුලේ පියා, පුත්රයා සහ තවත් පුද්ගලයින් තිදෙනෙකු මියගොස් තිබේ.
ඇඹිලිපිටිය, කුරුණෑගල, කොබෙයිගනේ සහ මහඔය යන ප්රදේශවලදී එම අනතුරු සිදුව ඇති බව පොලීසිය පැවසුවේය.
ඇඹිලිපිටිය – මිද්දෙණිය මාර්ගයේ ශ්රී සම්බුද්ධ ජයන්ති විහාරය ඉදිරිපිටදී කැබ් රථයක් සහ ඊට ප්රතිවිරුද්ධ දිශාවෙන් පැමිණි යතුරුපැදියක් මුහුණට මුහුණ ගැටීමෙන් සිදුවූ අනතුරකින් එකම පවුලේ පියා සහ පුත්රයා මියගොස් තිබේ.
අනතුරින් බරපතළ තුවාල ලැබූ 11 හැවිරිදි සහ 40 හැවිරිදි වියේ පසු වූ පුද්ගලයින් දෙදෙනා ඇඹිලිපිටිය රෝහලට ඇතුළත් කිරීමේදී මියගොස් ඇති බව පොලීසිය සඳහන් කළේය.
මේ අතර කුරුණෑගල සිට දඹුල්ල දෙසට ධාවනය වූ යතුරුපැදියක් පැදිකරුට පාලනය කරගත නොහැකිව ඒ දෙසටම ධාවනය වූ ලොරි රථයකට යටවීමෙන් සිදුවූ අනතුරකින් පුද්ගලයෙකු මියගොස් තිබේ.
අනතුරින් බරපතළ තුවාල ලැබූ 66 හැවිරිදි යතුරුපැදිකරු කුරුණෑගල රෝහලට ඇතුළත් කිරීමේදී මියගොස් ඇති බව සඳහන් වේ.
මේ අතර කොබෙයිගනේ, වීතිකුලිය ප්රදේශයේ අතුරු මාර්ගයකදී අධික වේගයෙන් ධාවනය වූ ත්රීරෝද රථයක් රියදුරුට පාලනය කරගත නොහැකිව මාර්ගයෙන් ඉවතට පැන විදුලි රැහැනක ගැටී අනතුරක් සිදුව ඇති බව පොලීසිය පැවසුවේය.
එහිදී බරපතළ තුවාල ලැබු ත්රීරෝද රථයේ රියදුරු නිකවැරටිය රෝහලට ඇතුළත් කිරීමෙන් අනතුරුව මියගොස් ඇති අතර ඔහු 25 හැවිරිදි කොබෙයිගනේ, පන්නව ප්රදේශයේ පදිංචි අයෙකු වේ.
මේ අතර මහඔය – අම්පාර මාර්ගයේ 69 හන්දිය දෙස සිට අම්පාර දෙසට ධාවනය වූ මෝටර් රථයක, ඊට පටුපසින් පැමිණි යතුරුපැදියක් ගැටීමෙන් අනතුරක් සිදුව ඇති බව සඳහන්ය.
අනතුරින් බරපතළ තුවාල ලැබූ යතුරුපැදිකරු මහඔය රෝහලට ඇතුළත් කිරීමේදී මියගොස් ඇති අතර ඔහු 24 හැවිරිදි අරන්තලාව ප්රදේශයේ පදිංචිව සිටි අයෙකු වන බව පොලීසිය සඳහන් කළේය.
