ඉන්දීය ටෙස්ට් නායකත්වයෙන් ඉවත්වීමෙන් පසු තමන්ට කෙටි පණිවුඩයක් හෝ යොමු කළ එකම තැනැත්තා හිටපු නායක මහේන්ද්ර සිං දෝණි පමණක් බව ඉන්දීය සුපිරි පිතිකරු විරාට් කෝලි පවසනවා.
2022 ආසියානු කුසලාන තරගාවලියේ පාකිස්ථානය සමඟ පැවති තරගයෙන් අනතුරුව පැවති මාධ්ය හමුවට එක්වෙමින් කෝලි මේ බව සඳහන් කළා.
තවත් බොහෝ ක්රීඩකයන් සතුව තමාගේ දුරකථන අංකය තිබුණ ද, ඔවුන් කිසිවකුගෙන් ඒ මොහොතේ තමාට ඇමතුමක් හෝ කෙටි පණිවිඩයක් නොපැමිණි බව ද එහිදී ඔහු වැඩිදුරත් සඳහන් කර සිටියා.
අසාර්ථක වූ විටදී නැවතත් සුපුරුදු රිද්මයට පැමිණීම සඳහා දිරිමත් කිරීමට ඉදිරිපත් වූයේ කවුරුන්දැයි යනුවෙන් මාධ්යවේදියකු නැඟු පැනයකට පිළිතුරු දෙමින් කෝලි සඳහන් කළේ මෙවැන්නක්.
“රූපවාහිණියට ඇවිත් අදහස් දක්වන අය නම් ගොඩක් ඉන්නවා. ඒත් මගේ දුරකථන අංකය තියෙන වෙන කිසිම කෙනෙකුගෙන් මට කෙටි පණිවුඩයක්වත් අවේ නෑ. අපි අතරෙ තියෙන සම්බන්ධය අව්යාජ නම් එහෙම වෙන්න බැහැනෙ. සම්බන්ධයක් අව්යජ නම් එකිනෙකා ආරක්ෂා කරගන්න ඕන. අපි අපිට අවංක වෙන්න ඕන. ඒත් මෙතනදි වෙන්නෙ වෙන දෙයක්, මට කියන් පුළුවන් එක දෙයයි. මට කෙනෙකුට දෙයක් කියන්න තියෙනවා නම් මම ඒක එයාට පෞද්ගලිකව කතා කරලා කියනවා. මොකද ප්රශ්නෙක දි කෙනෙකුට උදව් කරන්න අවශ්ය නම්, ඒකට අදාළ විසඳුම මුළු ලෝකෙටම ඇහෙන්න කියන එක තේරුමක් නැති වැඩක්. මට නම් එහෙම කියන දේවල්වල කිසිම වටිනාකමක් නෑ.”
